काठमाडौं- वैदेशिक रोजगार विभागले श्रम तथा रोजगार कार्यालय पोखरा र बुटवलबाट पनि वैदेशिक रोजगारीका लागि पूर्वश्रम स्वीकृति दिने व्यवस्था गरेको छ । विभागले बिहीबार विज्ञप्ति जारी गरी वैदेशिक रोजगारीमा जाने कामदार र सोसँग सम्बन्धित सरोकारवालाहरुको सहजताका लागि ती दुई स्थानमा रहेका श्रम कार्यालयलाई पूर्वश्रम स्वीकृतिको अधिकार प्रत्यायोजन गरेको जानकारी दिएको हो ।
यी कार्यालयबाट वैदेशिक रोजगारीमा पठाउन पूर्वस्वीकृतिका लागि प्राप्त निवेदन लिने र पूर्वस्वीकृति दिने कार्य हुने विभागले जनाएको छ ।‘वैदेशिक रोजगारीमा जाने कामदार र सोस“ग सम्बन्धित सरोकारवालाहरुको सहजताका लागि प्रत्यायोजित अधिकारमध्येबाट थप अधिकार उल्लिखित श्रम तथा रोजगार कार्यालयलाई प्रदान गर्दा सेवा प्रवाह सरल हुने भएकोले हाललाई श्रम तथा रोजगार कार्यालय, पोखरा र बुटवलबाट नेपाल राजपत्र (खण्ड ६८, पुस ९ गते, २०७५ साल अतिरिक्तांक ३२) को अधिकार प्रत्यायोजनसम्बन्धी सूचनाबमोजिम राजपत्रको दफा ४ लगायतका सम्पूर्ण कार्य गर्नेगरी अधिकार प्रत्यायोजन गरिएकोले अब उप्रान्त उल्लिखित कार्यहरु तत् तत् कार्यालयहरुबाटसमेत सम्पादन हुनेछ,’ विभागद्वारा जारी विज्ञप्तिमा भनिएको छ ।
विभागका अनुसार पोखरा र बुटवलमा रहेका श्रम तथा रोजगार कार्यालयबाट वैदेशिक रोजगार ऐन–२०६४ को दफा १५ बमोजिम वैदेशिक रोजगारमा कामदार पठाउन निश्चित संख्यामा माग निर्धारण गरी पूर्वस्वीकृतिका लागि प्राप्त निवेदन लिने र पूर्वस्वीकृति दिने काम हुनेछ । यस्तै वैदेशिक रोजगार ऐन, २०६४ को दफा १६ बमोजिम विज्ञापन गरे÷नगरेको सम्बन्धमा नियमित अनुगमन गरी सत्य तथ्य बुझ्ने अधिकार पनि ती कार्यालयलाई दिइएको छ ।
वैदेशिक रोजगार ऐन, २०६४ को दफा १९ बमोजिम तोकिएको संख्यामा नबढ्ने गरी श्रम स्वीकृतिको निस्सा (स्टिकर) का लागि निवेदन लिने र श्रम स्वीकृतिको निस्सा (स्टिकर) दिने काम ती कार्यालयबाट हुने छन् । वैदेशिक रोजगार ऐन, २०६४ को दफा २१ बमोजिम वैदेशिक रोजगारीका लागि व्यक्तिगतरुपमा विदेश जान चाहनेहरुबाट निवेदन लिने र विभागको प्राप्त निर्णय वा अधिकार प्रत्यायोजन भएअनुसार स्वीकृति दिने अधिकारसमेत ती कार्यालयलाई दिइएको छ ।
‘वैदेशिक रोजगार ऐन, २०६४ को दफा ३४ बमोजिम इजाजतपत्रवालाका शाखा कार्यालयहरुको अनुगमन तथा निरीक्षण गर्ने, वैदेशिक रोजगार ऐन, २०६४ को दफा ७४ तथा वैदेशिक रोजगार नियमावली, २०६४ को नियम ४७ र ४८ मा उल्लिखित व्यवस्थाको पालना गरे–नगरेको अनुगमन गर्ने,’ विभागको विज्ञप्तिमा उल्लेख छ ।
श्रम तथा व्यवसायजन्य सुरक्षा विभागअन्तर्गतका धनगढी, सुर्खेत, पोखरा, जनकपुर र विराटनगरमा रहेका श्रम तथा रोजगार कार्यालयलाई वैदेशिक रोजगार सम्बन्धी कार्य गर्नेगरी अधिकार प्रत्यायोजन भएको र सो अनुसार उक्त कार्यालयलाई प्रारम्भिक चरणमा पुनः श्रम स्वीकृति प्रदान गर्ने गरी यसअघि नै अधिकार प्रत्यायोजन भई सोहीबमोजिम कार्य भइरहेको विभागले जनाएको छ ।
पूर्वश्रम स्वीकृतिलगायत वैदेशिक रोजगारसम्बन्धी काम राजधानी केन्द्रित हु“दा श्रमिक र सरोकारवालाले सास्ती व्यहोर्दै आएका छन् । राजधानीबाहिर सेवा विस्तार नगरेकै कारण भैरहवास्थित गौतमबुद्ध अन्तर्राष्ट्रिय विमान सञ्चालनमासमेत समस्या हु“दै आएको छ । उक्त विमानस्थलबाट दैनिक उडान भरिरहेको एकमात्र विमान जजिरा एयरवेजले यात्रु नपाएको भन्दै हालै आफ्नो दैनिक उडान कटौती गरेको छ ।
वैदेशिक रोजगारीमा जाने कामदारलाई लक्षित गरी उडान सुरु गरेको जजिराले यात्रु नपाएपछि उडान कटौती गर्नुपरेको जनाएको छ ।यद्यपि, सातामा तीन वटा उडानलाई जजिराले निरन्तरता दिनेछ । जजिराले सुरुदेखि नै श्रम स्वीकृतिलगायत कार्य भैरहवाबाटै हुने व्यवस्था गर्न सरकारस“ग आग्रह गरेको थियो । तिवर्तमान श्रम, रोजगार तथा सामाजिक सुरक्षामन्त्री कृष्णकुमार श्रेष्ठले भैरहवामा श्रम कार्यालय उद्घाटन गरे पनि त्यहा“बाट श्रम स्वीकृतिको काम हुन सकेको छैन ।
प्रकाशित मिति: शुक्रबार, कात्तिक ४, २०७९ ०७:२९
-1752335779.jpg)
