काठमाडौं - श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने कामदारहरूको स्वास्थ्य परीक्षण गर्दा मापदण्ड पूरा गर्न निर्देशन दिँदै पत्राचार गरेको छ ।
रोजगारीका लागि विदेश जाने कामदारहरूको स्वास्थ्य परीक्षण गर्ने संस्थाहरूले मापदण्ड पूरा नगरेको पाइएको भन्दै मन्त्रालयले स्वास्थ्य परीक्षण मापदण्ड कार्यान्वयन गर्न पत्राचार गरेको हो ।
शुल्कअनुसारको स्वास्थ्य परीक्षणमा गुणस्तरीयता कायम गर्नुपर्ने जनाउँदै मन्त्रालयले आवश्यक मापदण्ड पूरा गरी संस्थाहरू सञ्चालन गर्न निर्देशन दिएको छ । मन्त्रालयले गरेको पत्राचारमा रगत परीक्षण गर्दा पूर्णस्वचालित प्रणालीमा आधारित हुनेगरी (कम्तीमा २०० टेस्ट प्रतिघण्टा क्षमता भएको) उपकरणबाट गर्नुपर्ने उल्लेख गरिएको छ ।
मन्त्रालयले पहिलो चरणमा गाम्का नेपालस“ग आबद्ध स्वस्थ्य परीक्षण गर्ने संस्थाहरूलाई मापदण्ड लागू गर्न निर्देशन दिएको छ । विशेषगरी मलेसिया, साउदी अरेबिया, बहराइन र ओमान जाने कामदारहरूको स्वस्थ्य परीक्षण गर्ने संस्थाहरूलाई मापदण्ड पूरा गराउन मन्त्रालयले जोड दिएको छ ।
यसपछि क्रमशः अन्य स्वास्थ्य परीक्षण संस्थाहरूमा मापदण्ड कार्यान्वयन गराउँदै लैजाने मन्त्रालयले जनाएको छ । मन्त्रालयले मापदण्ड पूरा गर्न ३५ दिनको समयसीमा दि“दै सम्बन्धित विशेषज्ञ समितिबाट अनुगमन हुने जानकारी दिएको छ ।
अन्यथा मापदण्ड विपरीत स्वास्थ्य संस्था सञ्चालन गरेको पाइएमा प्रचलित कानुनबमोजिम कारबाही गरिने मन्त्रालयले जनाएको छ ।
