काठमाडौं- वैदेशिक रोजगार विभागले इजाजतपत्र प्राप्त अभिमुखीकरण तालिम सञ्चालन गर्ने संस्थाहरूमा अनुगमन सुरु गरेको छ । अभिमुखीकरण तालिम प्रदायक संस्थाहरूको बारेमा विभिन्न किसिमका गुनासाहरू आएको भन्दै विभागले अनुगमन थालेको हो ।
विभागले बिहीबार एक सूचना जारी गर्दै अभिमुखीकरण तालिम सञ्चालन कार्यविधि २०७६ बमोजिम समय–समयमा अनुगमन तथा निरीक्षण गर्ने कार्य भइरहे पनि गुनासाे आउन नछाडेको भन्दै नियमित अनुगमन गरिने जनाएको छ ।
वैदेशिक रोजगारीमा जाने कामदारहरूले अनिवार्यरूपमा अभिमुखीकरण तालिम लिनुपर्ने व्यवस्था अनुसार विभागबाट नुमति प्राप्त विभिन्न तालिम प्रदायक संस्थाहरूले तालिम प्रदान गरिरहे पनि उद्देश्यअनुरूप सञ्चालन नभएको गुनासाे आएको विभागले उल्लेख गरेको छ ।
वैदेशिक रोजगारीलाई व्यवस्थित, मर्यादित र सुरक्षित बनाउन सरोकारवाला सबैको भूमिका उत्तिकै महत्वपूर्ण हुने विभागको भनाइ छ । अभिमुखीकरण तालिम सञ्चालन कार्यविधि २०७६ बमोजिम अनुगमन गर्ने कार्यलाई प्रभावकारीरूपमा कार्यान्वयन गरिएको जनाउँदै विभागले आगामी दिनमा अझै कडाइका साथ अनुगमन गर्ने उल्लेख गरेको छ ।
बिहीबार पहिलो चरणमा अभिमुखीकरण तालिम सञ्चालन गर्ने काठमाडौंस्थित विभिन्न छ वटा संस्थाहरूको अनुगमन गरेको विभागले जनाएको छ । विभागका निर्देशक एवं सूचना अधिकारी कृष्णप्रसाद भुसालले जारी गरेको सूचनामा अबका दिनमा अझै कडाइका साथ अनुगमन कार्यलाई प्रभावकारीरूपमा कार्यान्वयनमा ल्याइने जानकारी दिइएको छ ।
अनुगमन कार्य काठमाडौंमा मात्रै सीमित नभएर उपत्यकाबाहिरका संस्थाहरूमा पनि निरन्तरता दिइने विभागले जनाएको छ । वैदेशिक रोजगारी नियमावली, २०६४ को नियम २० बमोजिम रोजगारीका लागि विदेश जानुपूर्व वैदशिक रोजगार बोर्डले स्वीकृत गरेको पाठ्यक्रमअनुसार कामदारले अनिवार्य अभिमुखीकरण तालिम लिनुपर्ने व्यवस्था रहेको छ ।
अभिमुखीकरण तालिममा नेपालको वैदेशिक रोजगारसम्बन्धी कानुन, रोजगारदाता मुलुकको भौगोलिक स्थिति, सा“स्कृतिक रहनसहन, आर्थिक, सामाजिक र राजनीतिक अवस्थाको बारेमा जानकारी दिने बताइएकाे छ ।
यस्तै रोजगारीका लागि जाने मुलुकको भाषा, श्रम, अध्यागमन कानुन तथा ट्राफिक नियम एवं यौन तथा प्रजनन् स्वास्थ्यसम्बन्धी जानकारी गरेकाे छ । साथै, व्यवसायजन्य सुरक्षा, कामदारको आचरण, व्यवहार र सुरक्षाका विषयमा पनि सचेत पनि गरेकाे छ ।
