काठमाडौं- नेपाल उद्योग वाणिज्य महासंघले दक्षिण कोरिया र इजरायलमा प्रशिक्षार्थी कामदार पठाउन लागेको भन्ने विषयमा कुनै सत्यता नरहेको जनाएको छ ।
महासंघअन्तर्गत कृषि उद्यम केन्द्रमार्फत कोरिया र इजरायलमा प्रशिक्षार्थी कामदार पठाउने कुनै कार्यक्रम नरहेको महासंघले प्रस्ट पारेको छ । महासंघले बुधबार एक विज्ञप्ति
जारी गर्दै कृषि उद्यम केन्द्रमार्फत दक्षिण कोरिया र इजरायलको कृषि क्षेत्रमा प्रशिक्षार्थी कामदार पठाउने विषयमा कुनै निर्णय तथा कार्यक्रम नभएको प्रस्टीकरण दिएको छ ।
महासंघले कोरिया र इजरायलका कृषि क्षेत्रमा प्रशिक्षार्थी कामदार पठाउन लागेको भन्दै विभिन्न सञ्चारमाध्यममा प्रकाशित समाचारप्रति आफ्नो ध्यानाकर्षण भएको जनाएको छ ।
‘दक्षिण कोरिया र इजरायलमा प्रशिक्षार्थी कामदार पठाउने सम्बन्धमा महासंघले कुनै पनि निर्णय नगरेको सबैमा जानकारी गराउन चाहन्छौं,’ विज्ञप्तिमा भनिएको छ ।
महासंघले आफ्ना कुनै पनि सदस्यहरूलाई प्रशिक्षार्थी कामदार पठाउनेबारे आग्रह नगरेको जानकारी दिएको छ । उक्त विषयमा कुनै सत्यता नरहेको भन्दै सोहीअनुसार सूचना प्रवाह
गर्न आफ्ना सदस्यहरूलाई महासंघले आग्रह गरेको छ ।
