काठमाडौं– वैदेशिक रोजगार विभागले दिएको निर्देशन अवज्ञा गर्ने म्यानपावरमाथि कारबाही हुने चेतावनी दिएको छ । वैदेशिक रोजगार व्यवसाय सञ्चालन गर्ने इजाजतपत्र प्राप्त संस्थाविरुद्ध दर्ता भएका उजुरीका सम्बन्धमा विभागले दिएको आदेश तथा निर्देशन अवज्ञा गर्ने म्यानपावरमाथि कारबाही हुने चेतावनी दिएको हो ।
विभागले बुधबार एक सूचना जारी गर्दै केही इजाजतपत्र प्राप्त संस्थाविरुद्ध परेका उजुरीका विषयमा प्रमाणसहितको जवाफ तोकिएको समयमा पेस नगरी त्यस्ता संस्थाहरूले विभागको पत्राचार, आदेश तथा निर्देशनको अवज्ञा गरेको जनाएको छ ।
उजुरीका सम्बन्धमा म्यानपावर कम्पनीहरूले बेवास्ता गर्दा विभागलाई समयमै उजुरी फस्र्योट गर्ने कार्यमा बाधा पुगेको उल्लेख गरेको छ । विभागले म्यानपावर कम्पनीहरूलाई आफूविरुद्ध दर्ता भएका उजुरी यथाशीघ्र फस्र्योट गर्ने व्यावसायिक कर्तव्य पूरा गरी वैदेशिक रोजगारलाई सुरक्षित, व्यवस्थित र मर्यादित बनाउने कार्यमा सहजीकरण गर्नसमेत आग्रह गरेको छ । अन्यथा, वैदेशिक रोजगार ऐन २०६४ को दफा ५४ बमोजिम कारबाही हुने विभागले प्रस्ट पारेको छ ।
विभागका निर्देशक एवं सूचना अधिकारी कृष्णप्रसाद भुसालले नेपाल सरकारबाट वैदेशिक रोजगारीका लागि खुला गरिएका श्रम गन्तव्य मुलुकहरूमा कामदार पठाउँदा म्यानपावर कम्पनीविरुद्ध परेका उजुरी फस्र्योट गर्नु व्यवसायीहरूको दायित्व रहेको बताए ।
उनका अनुसार विभागमा वर्षमा २२÷२५ सय उजुरी पर्ने गरेको छ । जसमा ३०÷३५ प्रतिशत उजुरी फस्र्योट हुने गर्छ । त्यस्तै विभागमा उजुरी परेपछि आपसी सहमतिमा कुरा टुंग्याउने थुप्रै घटना रहेको र त्यसको जानकारी विभागलाई नदिने हु“दा उजुरी फस्र्योटमा समस्या देखिएको सूचना अधिकारी भुसालको भनाइ छ ।
व्यवसायीहरूले व्यवसाय पनि गरुन् र समस्याहरू पनि हल गर्दै जाउन् भन्ने अभिप्रायले सचेत गराउन विभागले सूचना जारी गरेको उनले जानकारी दिए । यदि, कसैले अटेर गर्छ वा निर्देशनको कुनै वास्ता गर्दैन भने उनीहरू स्वतः कारबाहीको भागिदार हुने भुसालले बताए।
