काठमाडौं– कतारले नेपाल सरकारसँगको सहमतिविपरीत घरेलु कामदार (महिला तथा पुरुष)का लागि भिसा आवेदन खुला गरेको छ । कतारको आन्तरिक मामिला मन्त्रालयले घरेलु कामदार लिनेगरी भिसा खुला भएको जानकारी दिँदै त्यसका लागि अनलाइन बुकिङ गर्नसक्ने जनाएको हो ।
काठमाडौंस्थित कतार भिसा सेन्टरले घरेलु कामदारले भिसा आवेदन दिनसक्ने त्यहाँको आन्तरिक मामिला मन्त्रालयको सूचनालाई सार्वजनिक गरेको छ । तर, कतारले यस विषयमा श्रम, रोजगार तथा सामाजिक सुरक्षा मन्त्रालयलाई कुनै जानकारी दिएको छैन । मन्त्रालयका सहसचिव एवं प्रवक्ता डण्डुराज घिमिरेले यस विषयमा अनभिज्ञता प्रकट गरे । कतारले कसरी एकतर्फी रुपमा घरेलु कामदारका लागि भिसा खुला गरेको सूचना जारी गर्यो भन्नेबारे जानकारी नभएको उनले बताए ।
गत मंसिरमा दुई देशबीच नेपालमा सम्पन्न संयुक्त बैठकले कतारले घरेलु कामदार लैजानका लागि नेपाललाई ‘इम्प्लिमेण्टेसन प्रोटोकल’ अर्थात् अनुरोधपत्र पठाउने र पत्र प्राप्त भइसकेपछि आवश्यक प्रक्रिया पूरा गरी घरेलु कामदार पठाउने व्यवस्था गर्ने सहमति भएको घिमिरेले जानकारी दिए । ‘कतारले घरेलु श्रमका लागि कामदार आपूर्ति गर्न भिसा खुला गर्नु उसको कुरा भयो,’ उनले भने, तर, हामीलाई कुनै जानकारी वा प्रस्ताव नआएका कारण घरेलु श्रमका नेपालीलाई गइहाल भनेर अनुमति दिन सकिँदैन ।’
हाल नेपालबाट घरेलु कामदारका रुपमा कतारमा गई काम गर्न बन्देज छ । कतार मात्र नभई घरेलु श्रममा जाँदा विशेषगरी खाडीका मुलुकहरुमा महिला कामदारमाथि शारीरिक, मानसिक तथा आर्थिक शोषणका समस्या सार्वजनिक भएपछि सरकारले संसदीय समितिको सिफारिसका आधारमा श्रम स्वीकृति दिन रोक लगाएको थियो ।
त्यसपछि नेपालबाट घरेलु कामदार पठाउन लगाएको प्रतिबन्ध हटाइदिन कतारले गरेको आग्रहलाई द्विपक्षीय संयुक्त समिति गठन गर्ने र त्यसको सुझावलाई श्रम सम्झौता पुनरवलोकनको क्रममा समेट्ने सहमति भएको थियो । सो अनुरुप कतारले अनुरोधपत्र नपठाई भिसा खुला गरिएको विषयमा तत्काल कुनै प्रक्रिया अगाडि बढाउन नसकिने मन्त्रालयले जनाएको छ ।
संसदीय समितिको सिफारिसमा रोकिएको घरेलु कामदारको श्रम स्वीकृतिका लागि दुई देशबीच भएको सहमतिअनुसारको पत्र प्राप्त भएमा मात्रै आवश्यक प्रक्रिया बढाउने मन्त्रालयले उल्लेख गरेको छ ।नेपाल र कतारबीच भएको सहमतिअनुसार मन्त्रालयले घरेलु कामदार पठाउने विषयमा आवश्यक राय माग गर्दै परराष्ट्र मन्त्रालयमा पत्र पठाइए पनि अझै त्यसको जवाफ आइनसकेको बताइन्छ ।
तस्बिरः कतार भिसा सेन्टरले जारी गरेको सूचना ।
प्रकाशित मिति: शुक्रबार, असोज १४, २०७९ १४:१८
-1752335779.jpg)
