काठमाडौं - मलेसियामा मृत्युदण्डको सजाय सुनाइएका नेपाली नागरिक सुरजदेव साह तेलीको सजाय परिवर्तन भएको छ । मलेसियाको पुत्रजायस्थित पुनरावेदन अदालतले बिहीबार उनलाई मृत्युदण्डको सजाय परिवर्तन गरी १२ वर्ष जेल सजाय सुनाएको त्यहाँस्थित नेपाली दूतावासले जानकारी दिएको छ ।
सजाय परिवर्तन भएसँगै सुरजदेव मृत्युदण्डबाट जोगिएका छन् । धनुषाको साविक गोविन्दपुर–२ का सुरजदेव सन् २०१६ डिसेम्बरमा पक्राउ परेका थिए । उनी कर्तव्य ज्यान (हत्या)को अभियोगमा पक्राउ परेका हुन् । उक्त मुद्दामा मलेसियाको इपो उच्च अदालतले सन् २०२० अगस्टमा सुरजलाई मृत्युदण्डको सजाय तोकेको थियो । मलेसियाको फौजदारीसंहिताको दफा ३०२ बमोजिम मृत्युदण्डको सजाय तोकेको थियो ।
उच्च अदालतको उक्त फैसलाविरुद्ध नेपाली दूतावासले पुनरावेदन दर्ता गराएको थियो । क्वालालम्पुरस्थित नेपाली दूतावासका अनुसार पुनरावेदन अदालतले बिहीबार मलेसियन फौजदारीसंहिताको दफा ३०२ बाट दफा ३०४ (क) मा परिवर्तन गरी १२ वर्ष जेल सजाय कायम गरेको हो ।
‘मृत्युदण्ड सम्बन्धमा गरिएको पुनरावेदनमा पुत्रजयास्थित सम्मानित पुनरावेदन अदालतले आज सन् २०२२ सेप्टेम्बर ८ का दिन सुरजदेव साह तेलीको कसँरलाई मलेसियन फौजदारी संहिताको दफा ३०२ बाट दफा ३०४ (क) मा परिवर्तन गरी १२ वर्ष जेल सजाय कायम गरेको छ,’ दूतावासले बिहीबार जारी गरेको प्रेस विज्ञप्तिमा भनिएको छ । अब बाँकी अवधिको जेल सजाय सकिएपश्चात् सुरज नेपाल फर्कने छन् ।
उनलाई सन् २०१६ डिसेम्बर २ को बिहान ४ बजे एक मलेसियन नागरिकको हत्या गरेको अभियोग लागेको थियो । सोही अभियोगमा उनीविरुद्ध अदालतमा मुद्दा चलेको हो । यता सुरजले भने उक्त आरोप अस्वीकार गर्दै आएका छन् । आफूले हत्या गरेको नभई शव व्यवस्थापन गर्न सहयोगमात्रै गरेको सुरजको दाबी छ ।
