काठमाडौं- नेपाल वैदेशिक रोजगार व्यवसायी संघले लामो समयको अलमलपछि साधारणसभा र निर्वाचनको मिति तय गरेसँगै व्यवसायीहरुमाझ चुनावी महोल छाएको छ । यसअघि सहमतिअनुरुप निर्वाचन हुन नसकेको संघमा तदर्थ कार्यसमितिले आगामी पुस ८ गते निर्वाचन गर्ने मिति तोकेको छ । मिति घोषणासँगै व्यवसायीहरुले चुनावको तयारी सुरु गरेका छन् ।
त्यसो त यतिबेला मुलुकमा प्रतिनिधिसभा र प्रदेशसभा चुनावको माहोल तातिसकेको छ । आगामी मंसिर ४ गते एकैचरणमा हुने निर्वाचनको तयारीमा सरकार, निर्वाचन आयोग तथा राजनीतिक दलहरु होमिसकेका छन् । उक्त निर्वाचनको एक महिनापछि हुनेगरी वैदेशिक रोजगार व्यवसायी संघको निर्वाचन तय गरिएको हो । यसले व्यवसायीहरुमा चुनावको दोहोरो रौनक ल्याएको छ ।
यसअघि गत वर्ष पुस ३० गते संघको साधारणसभा र निर्वाचन गर्ने मिति तय भए पनि विवादका कारण स्थगित भएको थियो । संघले निर्वाचनको मिति तय गरेपछि विभिन्न दलनिकट व्यवसायी संगठनहरुबीच छलफल सुरु भएको एक व्यवसायीले बताए । संघको नयाँ नेतृत्वका लागि कडा प्रतिस्पर्धा हुने ती व्यवसायीको भनाइ छ ।
संघ स्रोतका अनुसार एमालेनिकट प्रगतिशील वैदेशिक रोजगार व्यवसायी मञ्च नेपाललाई एकल्याउने गरी गठबन्धन दलनिकटका संगठनहरुले तयारी थालेका छन् । यसअघि भएको सहमतिअनुसार नेपाली कांग्रेसनिकट नेपाल लोकतान्त्रिक वैदेशिक रोजगार व्यवसायी एसोसिएसन, माओवादीनिकटको नेपाल गणतान्त्रिक वैदेशिक रोजगार व्यवसायी मञ्च, एकीकृत समाजवादीनिकट एकीकृत वैदेशिक रोजगार व्यवसायी संगठन र समाजवादी फोरमनिकट संघले साझा उम्मेदवार खडा गर्ने तयारीमा जुटेको स्रोतको दाबी छ ।
संघको अध्यक्ष, सचिव र कोषाध्यक्षमा कांग्रेसनिकट लोकतान्त्रिक एसोसियसनले दाबी गरेको छ । त्यस्तै माओवादीनिकट गणतान्त्रिक मञ्चलाई प्रथम र द्वितीय उपाध्यक्ष, एकीकृत समाजवादीनिकट एकीकृत व्यवसायी संगठनलाई महासचिव र समाजवादी संघलाई तृतीय उपाध्यक्ष हुनेगरी पदाधिकारीको बाँडफाड गर्ने तयारीमा संगठनहरु जुटेका छन् ।
प्रारम्भिक तयारीअनुसार सहमति जुटेमा उल्लिखित संगठनबाट क–कसलाई पदाधिकारीमा पठाउने भन्ने विषयमा भने आन्तरिक विवाद देखिनसक्ने बताइएको छ । यद्यपि, नेतृत्व चयनमा सहमतिको ढोका खुल्लै राख्ने गठबन्धनका संगठनहरुले जनाएका छन् । उनीहरुले सहमतिमा आए प्रगतिशील मञ्चलाई एक उपाध्यक्षसहित केही सदस्य दिन सकिने बताएका छन् ।
गठबन्धन दलनिकटका संगठनहरुले मिलेर चुनावमा जाने मनस्थिति बनाएपछि एमालेनिकट प्रगतिशील मञ्चले त्यसको सशक्त प्रतिवाद गर्ने जनाएको छ । मञ्चका महासचिव जनक रावलले व्यावसायिक संस्थाको निर्वाचन राजनीतिक आस्थाको आधारमा गराउने र नेतृत्व कब्जा गर्ने गठबन्धनविरुद्ध सशक्त प्रतिवाद गर्ने बताए ।
प्रकाशित मिति: मंगलबार, भदौ १४, २०७९ ११:४६
-1745656903.jpeg)