काठमाडौं– वैदेशिक रोजगारीको सिलसिलामा साउदी अरेबिया पुगी दुर्घटनामा परेर ११ वर्षदेखि अस्पतालमा रहेका धनुषाका चण्डेश्वर महतोलाई नेपाल ल्याइएको छ । उनलाई साउदीस्थित नेपाली दूतावासको सहयोगमा शुक्रबार नेपाल ल्याइएको हो ।
रोजगारीका लागि साउदी पुगेको एक वर्षपछि सडक दुर्घटनामा परेर गम्भीर घाइते भएका महतोको उपचारमा रोजगारदाता कम्पनी पन्छिएर सम्पर्कमा नआएपछि नेपाल ल्याउन आवश्यक पहल थालिएको थियो । महतोलाई परिवारले आर्थिक कारणले नेपाल फर्काएर थप उपचार गर्न असमर्थता जनाउँदै आएका थिए ।
बिमा कम्पनीले गर्नुपर्ने उपचार नगरेर आफ्नो जिम्मेवारीबाट पन्छिए पनि रोजगारदाताले केही वर्षसम्म उपचार गराएको दूतावासले जनाएको छ । यसबीचमा महतोको परिवारलाई मनाएर उनलाई नेपाल फर्काउन रोजगारदाताले पटक पटक आग्रह गरेको तर महतोको परिवार त्यसमा राजि नभएकाका कारण यत्रो वर्ष साउदी अस्पतालमै बस्नुपरेको दूतावासको भनाइ छ ।
दूतावासले अस्पताल प्रशासनलाई आग्रह गरेर उपचारबापतको ४० लाख रियाल बक्यौता रकम मिनाहा गराएको र परिवारसँगको सहमतिमा उनलाई नेपाल फर्काएको दूतावासको भनाइ छ ।
प्रकाशित मिति: सोमबार, भदौ १३, २०७९ ०८:१४
-1752335779.jpg)
