काठमाडौं- दक्षिण कोरियामा थप आठ हजार नेपालीले रोजगारी पाउने भएका छन् । रोजगार अनुमति प्रणाली (इपिएस)मार्फत दक्षिण कोरियामा उत्पादन क्षेत्रतर्फ यसअघि तोकिएभन्दा बढी नेपालीले रोजगारी पाउने भएका हुन् ।
एचआरडी कोरियाले उत्पादन क्षेत्रतर्फ यसअघि तोकिएभन्दा आठ हजार बढी नेपालीलाई भाषा परीक्षामा उत्तीर्ण गराउने जनाएको छ ।उत्पादनतर्फको पहिलो र दोस्रो चरणको भाषा परीक्षाबाट उत्तीर्ण हुनेको संख्यामा आठ हजार थप गरी रोस्टरमा सूचीकृत गर्न एचआरडी कोरियाबाट पत्र प्राप्त भएको वैदेशिक रोजगार विभागअन्तर्गतको इपिएस कोरिया शाखाले जनाएको छ ।
यसअघि उत्पादन क्षेत्रतर्फ पहिलो चरणको परीक्षाबाट तीन हजार १३० र दोस्रो चरणको परीक्षाबाट तीन हजार ७८३ गरी कूल छ हजार ९१३ जनालाई उत्तीर्ण गराउने जनाएको थियो ।उत्पादनतर्फको परीक्षामा उत्तीर्ण गराउनेको संख्या थपिएस“गै पहिलो चरणको परीक्षाबाट छ हजार ७५२ र दोस्रो चरणबाट आठ हजार १६१ गरी कूल १४ हजार ९१३ जना उत्तीर्ण हुने छन् ।
यसपटक उत्पादनतर्फ ३३ हजार ९०० र कृषितर्फ नौ हजारले फाराम भरेका थिए । उत्पादनतर्फको पहिलो चरणको परीक्षा गत साउन २ देखि सुरु भएको थियो । पहिलो चरणको परीक्षाको नतिजा यही भदौ १७ गते आउने इपिएस कोरिया शाखाले जनाएको छ ।दोस्रो चरणको परीक्षा यही भदौ २ गतेदेखि चलिरहेको छ ।
शाखाका निर्देशक पुष्पराज कटुवाल परीक्षामा उत्तीर्ण हुनेको संख्या बढ्ने भएसँगै रोजगारीका लागि कोरिया जाने युवाको संख्या पनि वृद्धि हुने बताए । ‘यो नेपाली युवाका लागि अवसर हो,’ उनले भने, ‘कोरिया सरकारले नेपालीलाई रुचाएको देखिएको छ ।’
सन् २००८ देखि इपिएसमार्फत नेपाली युवा रोजगारीका लागि दक्षिण कोरिया जाँदै आएका छन् । इपिएसबाट ७३ हजार नेपाली कोरिया पुगिसकेका छन् । उनीहरुले चार वर्ष १० महिना कोरियामा काम गर्न पाउँछन् । हाल कोरियामा ३३ हजार इपिएस श्रमिक छन् ।
दक्षिण कोरियाले इपिएस प्रणालीमार्फत विभिन्न १६ देशबाट श्रमिक लैजाँदै आएको छ । इपिएसबाट श्रमिक लैजाने मुलुकको सूचीमा नेपाल दोस्रो स्थानमा छ । सबैभन्दा बढी कम्बोडियाबाट श्रमिक कोरिया पुगेका छन् ।
प्रकाशित मिति: शुक्रबार, भदौ १०, २०७९ १०:०४
-1745656903.jpeg)