काठमाडौं- भिजिट भिसामा कुवेत जान लागेका ३९ जना महिलालाई त्रिभुवन अन्तर्राष्ट्रिय विमानस्थलबाटै फर्काइएको छ । नेपाल प्रहरीले कुवेत जान लागेका महिलाहरुको कागजात शंकास्पद देखिएको भन्दै विमानस्थलबाटै फर्काएको हो ।
बुधबार बिहान जजिरा एयरबाट कुवेत जान लागेका महिलाहरुलाई शंकास्पद कागजातका आधारमा रोकेको प्रहरीले जानकारी दिएको छ । कुवेतमा भिजिट भिसामा जान लागेको देखिए पनि उनीहरुले बोकेको कागजातस“ग मेल नखाएपछि प्रहरीले प्रस्थान कक्षमा प्रवेश गर्न रोक लगाएको थियो ।
कुवेत हुँदै दुबईमा भिजिट भिसामा जान लागेको बताइए पनि विश्वसनीय आधार नदेखिएपछि फर्काइएको प्रहरी स्रोतको दाबी छ । उनीहरु एजेन्टमार्फत भिजिट भिसामा कुवेत पुगेर दुबई जाने र श्रम भिसा दिलाउने प्रलोभनमा परेको हुनसक्ने प्रहरीले अनुमान गरेको छ । उनीहरुलाई प्रस्थान कक्षमा प्रवेश गर्नुअघि कुवेत हु“दै दुबई जाने कुरामा आशंका भएपछि प्रहरीले सोधपुछ गरेको थियो ।
विमानस्थल अध्यागमन कार्यालयका प्रमुख पुष्पराज शाहीका अनुसार कुवेत जान लागेका महिलाहरुको भनाइ र कागजातमा मेल नखाएका कारण प्रहरीले प्रस्थान कक्षको गेट क्षेत्रबाटै उनीहरुलाई फर्काएको हो । प्रहरीले गेट क्षेत्रबाटै महिलाहरुलाई फिर्ता गरिदिएको जानकारी आए पनि कुनै पनि महिलाले अध्यागमनमा सम्पर्क नगरेको उनले बताए ।
भिजिट भिसाको बहानामा रोजगारीका लागि विभिन्न मुलुकमा जाने नेपालीहरु बिचल्ली पर्न थालेपछि सरकारले भिजिट भिसामा खाडी मुलुक जान कडाइ गर्दै आएको छ । सोहीअनुरुप विमानस्थलमा पनि आवश्यक जा“चपश्चात् शंकास्पद देखिएकाहरुलाई भिजिट भिसामा विदेश जान रोक लगाउनुपरेको कार्यालयले जनाएको छ ।
प्रकाशित मिति: बिहीबार, भदौ ९, २०७९ ११:४४
-1745656903.jpeg)