काठमाडौं- नेपाल र बेलायत सरकारबीच रोजगारीका लागि नेपाली स्वास्थ्यकर्मी लैजाने समझदारीपत्रमा हस्ताक्षर भएको छ । सोमबार श्रम, रोजगार तथा सामाजिक सुरक्षा मन्त्रालयमा आयोजित कार्यक्रममा दुई देशबीच बेलायतको स्वास्थ्य क्षेत्रमा नेपाली स्वास्थ्यकर्मी (नर्स)लाई रोजगारी दिनेसम्बन्धी श्रम समझदारीपत्रमा हस्ताक्षर भएको हो ।
श्रममन्त्री शेरबहादुर कुँवरको उपस्थितिमा श्रमसचिव एकनारायण अर्याल र नेपालका लागि बेलायतका राजदँत निकोला पोलिटले समझदारीपत्रमा हस्ताक्षर गरेका छन् । लामो समयदेखि प्रतीक्षाको विषय बनेको श्रम समझदारीपश्चात नेपाली स्वास्थ्यकर्मीहरुलाई विधिसम्मत तवरले बेलायतको स्वास्थ्य क्षेत्रको रोजगारीमा सहज संलग्न हुने वातावरण तयार हुने एवं नेपाली स्वास्थ्य क्षेत्रमा संलग्न जनशक्तिको विकासमासमेत मद्दत पुग्ने विश्वास लिइएको छ ।
समझदारीअनुसार बेलायतको स्वास्थ्य सेवामा कार्यरत रहँदा नेपाली स्वास्थ्यकर्मीको सेवा सुविधा र अधिकार बेलायती स्वास्थ्यकर्मीसरह हुने व्यवस्था मिलाइएको छ । बेलायत पठाउने नेपाली स्वास्थ्यकर्मी छनोट वैदेशिक रोजगार विभाग तथा बेलायतको डिपार्टमेण्ट अफ हेल्थ एण्ड सोसियल केयर वा तोकिएको निकायको प्रत्यक्ष संलग्नतामा हुनेछ । रोजगारीका लागि छनोट भएका स्वास्थ्यकर्मीले शँन्य लागतमा बेलायत जाने अवसर प्राप्त गर्ने छन् ।
समझदारीमा नियुक्ति प्रक्रियाका लागि कुनै शुल्क नलाग्ने एवं रोजगारीका लागि छनोट भएका स्वास्थ्यकर्मीको लागतको शोधभर्नासमेत हुने उल्लेख छ ।
नेपाली स्वास्थ्यकर्मीको छनोट, पदस्थापना र सेवा सुविधासम्बन्धी मापदण्डको विषयमा थप छलफल भइरहेको मन्त्रालका उपसचिव एवं सहायक प्रवक्ता थानेश्वर भुसालले बताए । उनका अनुसार स्वास्थ्यकर्मीको सेवा, सर्त र सुविधा कार्यान्वयन ढाँचा (इम्प्लिमेन्टेसन प्रोटोकल) बमोजिम हुनेछ ।
श्रमसचिव अर्यालले नेपालमा केही नर्स बेरोजगार रहेको र केही अत्यन्त न्यँन पारिश्रमिकमा काम गर्न बाध्य रहेको अवस्थामा दुई देशबीच भएको ऐतिहासिक समझदारीले स्वास्थ्यकर्मी बेरोजगार बन्नुपर्ने अवस्थाको अन्त्य गरेको बताए । स्वास्थ्य मन्त्रालय, मेडिकल काउन्सिललगायत निकायसँग छलफल गरेर मात्रै बेलायत रोजगारीमा पठाइने जनशक्तिको संख्या टुंगो लगाइने उनले बताए ।
प्रकाशित मिति: मंगलबार, भदौ ७, २०७९ ०९:३३
-1752335779.jpg)
