काठमाडौं- वैदेशिक रोजगारीमा जाने नेपाली कामदारहरु व्यक्तिगतभन्दा म्यानपावरबाट बढी ठगीमा पर्ने गरेको देखिएको छ । आप्रवासी कामदारहरुको पक्षमा निःशुल्क कानुनी सहायता प्रदान गर्दै आएको संस्था पिपुल फोरमले तयार पारेको प्रतिवेदनअनुसार म्यानपावर कम्पनीहरुले बढी ठगी गर्ने गरेको देखाएको हो ।
फोरमले सुरक्षित आप्रवासन परियोजनाअन्तर्गत तयार गरेको तथ्यांकमा आर्थिक वर्ष २०७८/७९ को असार मसान्तसम्म दुई हजार ८५४ जना वैदेशिक रोजगारीको सिलसिलामा ठगीमा परेको उल्लेख गरेको छ । यसरी ठगीमा परेका पीडितहरूलाई फोरमले निःशुल्क कानुनी सहायता तथा सहजीकरण गर्दै आएको जनाएको छ ।
फोरममा कानुनी सहायताका लागि आएकामध्ये एक हजार ३७६ जना व्यक्तिमार्फत ठगिएका छन् भने म्यानपावरमार्फत एक हजार ४७८ जना ठगिएका छन् । यसरी तथ्यांकको अधारमा हेर्दा व्यक्तिगतभन्दा म्यानपावरमार्फत ठगिनेको संख्या धेरै भएको निःशुल्क कानुनी सहायता परियोजनाका संयोजक एवं अधिवक्ता सुदीप देवकोटाले बताए ।
उनका अनुसार झण्डै ५२ प्रतिशतभन्दा बढी म्यानपावरमार्फत ठगीमा परेको देखिन्छ भने ४८ प्रतिशत व्यक्तिगत रुपमा ठगिएका छन् ।फोरमको तथ्यांकअनुसार हालसम्म पीडितहरूले विभिन्न मुद्दामा ८० करोड ६९ लाख ३३ हजार ८८० बराबर क्षतिपूर्ति पाइसकेका छन् ।
कानुनी सहायतामार्फत पीडितको उद्धारका लागि चार सय ५२ मुद्दा परेकोमा १३७ जनाले मात्रै न्याय पाएको उल्लेख गरिएको छ । त्यस्तै, पासपोर्ट जफतका १०४ घटना आएकोमा हालसम्म ५१ जनाले फिर्ता पाएका छन् ।पछिल्लो समय फोरमले मानव बेचबिखनका मुद्दामा पनि निःशुल्क कानुनी सहायता प्रदान गर्न थालेको जनाएको छ ।
फोरमले हालसम्म ६४ जना यस्ता पीडितलाई निःशुल्क सेवा प्रदान गरेको छ । पछिल्लो समय वैदेशिक रोजगारमा जोखिम बढ्दै गएकाले सरोकारवाला सबैले ध्यान पुर्याउनुपर्ने फोरमका संस्थापक सोम लुईंटेलले बताए ।
सरकारका कतिपय नीतिकै कारण वैदेशिक रोजगारमा जाने नेपालीहरुले न्याय पाउन कठिन भइरहेको फोरमले उल्लेख गरेको छ । यस्तो समस्या साउदी अरेबियामा जाने कामदारहरुमा बढी देखिएको जनाइएको छ ।
प्रकाशित मिति: बिहीबार, साउन १२, २०७९ ०८:४४
-1752335779.jpg)
