काठमाडौं - सरकारले रोजगारीको उद्देश्यका साथ भिजिट भिसामार्फत विदेश नजान आमनागरिकलाई अनुरोध गरेको छ । गृह मन्त्रालयले सुरक्षित श्रम तथा रोजगारीको प्रलोभनमा परेर भिजिट भिसामार्फत विदेश नजान अनुरोध गरेको हो ।
वैदेशिक रोजगारीको उद्देश्यले भिजिट भिसामार्फत विदेश जाँदा समस्या देखिएको भन्दै मन्त्रालयले बुधबार एक विज्ञप्ति जारी गरेर त्यसो नगर्न अनुरोध गरेको छ । पछिल्लो समयमा भिजिट भिसामा विदेश गएर अलपत्र पर्ने, काम नपाउने र गन्तव्य मुलुकबाट प्रवेश निषेध भई फर्कनुपर्नेलगायतका समस्या देखिएको मन्त्रालयले जनाएको छ ।
रोजगारीको मनसाय राखी भिजिट भिसामा नेपालीहरु विदेश गई अलपत्र पर्ने र विभिन्न समस्यामा फस्ने गरेको गुनासो आएको भन्दै मन्त्रालयले यस्तो उद्देश्य राखेर विदेश नजान पनि सचेत गराएको छ ।
मन्त्रालयले गैरकानुनीरुपमा विदेश गई समस्यामा परेकालाई उद्धार गरी स्वदेश ल्याउनुपर्ने अवस्थामा बिमा, क्षतिपूर्ति तथा राहत उपलब्ध गराउनसमेत नेपाल सरकारसँग कुनै कानुनी आधार नरहने बताएको छ ।
विज्ञप्तिमा वैदेशिक रोजगारीको लागि जान चाहने व्यक्तिले प्रचलित कानुनअनुसार श्रम स्वीकृतलगायतका प्रक्रिया पूरा गरेर मात्र जानुपर्ने उल्लेख गरिएको छ । साथै, स्थानीय तहलेसमेत आफ्नो क्षेत्रका नागरिकले विदेश भ्रमण वा रोजगारीमा जाँदा आवश्यक कानुनी प्रक्रियाको सहजीकरण तथा परामर्श प्रदान गर्ने व्यवस्था मिलाउन अनुरोध गरिएको छ ।
भिजिट भिसामा गई श्रम तथा रोजगारीको गतिविधिमा संलग्न हुनु गैरकानुनी भएको हुँदा पर्यटकको रुपमा मात्र प्रयोग गर्न सकिने मन्त्रालयले जनाएको छ ।
प्रकाशित मिति: बिहीबार, साउन १२, २०७९ ०८:३२
-1752335779.jpg)
