काठमाडौं- वैदेशिक रोजगार बोर्डको सचिवालयले श्रम स्वीकृति लिएर वैदेशिक रोजगारमा गई करार अवधिभित्र मृत्यु, पूर्णरुपमा अशक्त वा गम्भीर बिरामी भएका कामदारका बलबालिकालाई छात्रवृत्ति दिने उद्देश्यले आवेदन माग गरेको छ ।
बोर्डको सचिवालयले सम्बन्धित सरोकारवालाहरुको जानकारीका लागि सोमबार एक सूचना जारी गरी बालबालिका अध्ययनरत शैक्षिक संस्थामा २०७९ असोज मसान्तभित्र निवेदन दिन भनेको छ ।
शैक्षिक सत्र २०७९ का लागि बोर्ड सचिवालयले वैदेशिक रोजगार छात्रवृत्ति सञ्चालन कार्यविधि, २०७१ को अनुसूचीबमोजिम विद्यार्थीले निवेदन पेस गर्नुपर्ने जनाएको छ । निवेदनका साथ कामदारले लिएको श्रम स्वीकृतिको निस्साको प्रतिलिपि, नागरिकताको प्रतिलिपि, मृत्यु भएका कामदारको हकमा मृत्यु दर्ताको प्रतिलिपि, बोर्डबाट आर्थिक सहायता लिएको प्रमाणित हुने राहदानीको प्रतिलिपि, अशक्त भएका कामदारको पूर्णरुपमा अशक्त भएको खुल्ने कागजात, नाता प्रमाणको प्रतिलिपि, विद्यार्थीको जन्मदर्ता प्रतिलिपि र सम्बन्धित स्थानीय तहको सिफारिस अनिवार्य पेस गर्नु पर्नेछ ।
छात्रवृत्ति प्राप्त गर्नका लागि श्रम स्वीकृति लिएर वैदेशिक रोजगारमा गई मृत्यु, अंगभंग वा गम्भीर बिरामी भई बोर्डबाट सतप्रतिशत आर्थिक सहायता लिएका कामदारको छोराछोरी हुनु पर्नेछ । त्यस्तै सामुदायिक तथा संस्थागत विद्यालयमा अध्ययनरत विद्यालयस्तरमा १८ वर्षमुनिका बालबालिकाहरु मात्रै छात्रवृत्तिका लागि योग्य हुने छन् ।
वार्षिकरुपमा आधारभूत तहका लागि आठ हजार रुपैयाँ र माध्यामिक तहका लागि १२ हजार रुपैयाँको छात्रवृत्ति सीमा रहेको छ । एक विद्यार्थीलाई एउटा कक्षामा एक पटकका लागि मात्र वार्षिकरुपमा एकमुष्ट वैदेशिक रोजगार छात्रवृत्ति उपलब्ध गराइने बोर्डले जनाएको छ । यसका लागि बोर्डले शिक्षा मानव विकास स्रोत केन्द्र वा सोझै विद्यालयमार्फत विद्यार्थीलाई छात्रवृत्ति रकम उपलब्ध गराउनेछ ।
प्रकाशित मिति: बुधबार, साउन ११, २०७९ ०९:४३
-1752335779.jpg)
