काठमाडौं- नेपाल ट्रेड युनियन महासंघ (जिफन्ट)ले वैदेशिक रोजगारीमा गएका नेपाली कामदारहरुको हितका लागि विशेष अभियान सञ्चालन गर्ने भएको छ । नेपाली कामदारहरुको हकमा विदेशमा अन्याय हुन नदिन ‘सीमापारीको समस्या: संगठन र सफलता’ भन्ने नाराका साथ कार्यक्रम सञ्चालन गर्ने भएको हो ।
जिफन्टको चार वर्षे अभियानले वैदेशिक रोजगारीमा गएका नेपालीहरुको आर्थिक, सामाजिक सुरक्षाका साथै ट्रेड युनियन आन्दोलनमा सक्रिय सहभागिता गराउन भँमिका खेल्ने अध्यक्ष विनोद श्रेष्ठले बताए । जिफन्टको आठौँ राष्ट्रिय महाधिवेसनपछि राजधानीमा भएको एक कार्यक्रममा श्रेष्ठले वैदेशिक रोजगारीमा रहेका, सबै प्रकृतिको ज्याला रोजगारी र स्वरोजगारीमा रहेका गरी २० लाख श्रमिकलाई सामाजिक सुरक्षा कोषमा आबद्ध गराउने अभियानमा जिफन्ट लागेको बताए ।
जिफन्टले आगामी चार वर्षभित्रमा २० लाख श्रमिकलाई सामाजिक सुरक्षा कोषमा आबद्ध गराउने लक्ष्यसहित बृहत् अभियान सञ्चालन गर्ने घोषणा गरेको छ । महाधिवेसनले पारित गरेको आगामी चार वर्षको कार्यक्रम प्रस्तुत गर्दै नवनिर्वाचित अध्यक्ष श्रेष्ठले स्वास्थ्य बिमाको प्रचार गर्ने, उपचारमा सहयोग गर्ने र प्रिमियम संकलनमा हस्तक्षेप गर्ने योजना पनि बनाएको जानकारी दिए । स्वदेश होस् वा विदेश, अन्यायपँर्ण तरिकाले श्रम शोषण भएको पाइएमा सम्बन्धित निकायसँगको समन्वयमा आवश्यक पहलकदमी लिने श्रेष्ठले प्रतिबद्धता व्यक्त गरे ।
जिफन्टले स्वदेशमै विभिन्न कलेजका विद्यार्थीलाई होटल, चेन रेस्टुराँ र मार्टहरुमा तालिम (इन्टर्न)का नाममा शुल्क लिएर इन्टर्नसिप गराउने गरेको पाइएको भन्दै यो अन्यायपँर्ण काम भएकाले ‘तालिमेलाई तलब’ नामको अभियान सञ्चालन गर्ने जनाएको छ । ज्याला रोजगारीलाई मर्यादित बनाउने, श्रम अडिट कार्यान्वयन गर्न दबाब सिर्जना गर्नेलगायत अभियान पनि सञ्चालन गर्ने जिफन्टले जनाएको छ । यसैगरी पालिका तहमा श्रमिक पञ्जीकरणका लागि पनि तीव्रता दिने कार्यक्रम जिफन्टले पारित गरेको छ । युवा र महिलालाई ट्रेड युनियन आन्दोलनमा जोड्न पनि अभियान नै सञ्चालन गरिने भएको छ ।
जिफन्टको काठमाडौंमा तीन दिनसम्म चलेको महाधिवेसनले श्रेष्ठलाई पुनः अध्यक्षमा चयन गरी नयाँ राष्ट्रिय कमिटी बनेको छ । अधिवेशनले उपाध्यक्षहरुमा विदुर कार्की, जनक चौधरी, जितेन्द्र श्रेष्ठ, कमल गौतम, मञ्जुकुमारी थापा मगर र सीता लामालाई चयन गरेको छ । महासचिवमा लक्ष्मण शर्मा चयन भएका छन् । उपमहासचिवमा नरनाथ लुईंटेल र पदेन उपमहासचिवमा कमला तामाङ, सचिवहरुमा हरिबहादुर कार्की, कृष्णबहादुर केसी, स्मृति लामा, महेन्द्रलाल श्रेष्ठ, बेलीमाया घले, तारानीधि पन्त र पदेन सचिवमा विजया खड्का चयन भएका छन् । यही साउन ७ देखि १० गतेसम्म आयोजना भएको महाधिवेसनमा देशभरका झण्डै ५०० प्रतिनिधि सहभागी भएको जिफन्टले जनाएको छ ।
प्रकाशित मिति: बुधबार, साउन ११, २०७९ ०९:३९
-1752335779.jpg)
