काठमाडौं- श्रम, रोजगार तथा सामाजिक सुरक्षा मन्त्रालयले वैदेशिक रोजगारीको सिलसिलामा गम्भीर घाइते वा बिरामी भई विभिन्न देशका विभिन्न अस्पतालमा सघन उपचार गराइरहेका नेपालीहरुको उद्धार तथा सहयोगको लागि एक कार्यदल गठन गर्ने भएको छ । श्रममन्त्री शेरबहादुर कुँवरले विभिन्न देशमा सघन उपचाररत नेपालीको स्थिति बुझ्न र उनीहरुलाई सघाउन कार्यदल गठन गर्ने मन्त्रीस्तरीय निर्णय गरेका हुन् ।
उनले कार्यदल गठनका लागि मन्त्रालयका सचिव एकनारायण अर्याललाई निर्देशन दिएका छन् । तीन सदस्यीय कार्यदल बन्ने मन्त्रालयले जनाएको छ । जसमा मन्त्रालयका रोजगार व्यवस्थापन महाशाखाका प्रमुख संयोजक र परराष्ट्र मन्त्रालयका सहसचिव र वैदेशिक रोजगार बोर्डका कार्यकारी निर्देशक सदस्य रहने छन् ।
कार्यदलले विशेषगरी वैदेशिक रोजगारीमा गएका तर परिस्थितिवश घाइते तथा बिरामी भई सघन उपचारमा रहेका श्रमिकहरुको एकीकृत तथ्यांक तयार गर्ने, तिनीहरुलाई उद्धार गरी स्वदेशमा फर्काउने उपायहरुको पहिचान गर्ने मन्त्रालयका सहसचिव एवं प्रवक्ता डण्डुराज घिमिरेले बताए । उनका अनुसार बिरामीलाई स्वदेश ल्याएपश्चात सरल एवं प्रभावकारी उपचारको व्यवस्थापन गर्न आवश्यक स्रोत, साधन वैदेशिक रोजगार बोर्डको कल्याणकारी क्रियाकलापबाट व्यहोरिनेछ ।
परराष्ट्र मन्त्रालयले साउदी अरेबियाका विभिन्न अस्पतालमा गम्भीर अवस्थामा रहेका नेपाली बिरामीका सम्बन्धमा पटक–पटक लिखित जानकारी दिएपछि श्रम मन्त्रालय आवश्यक तयारीमा जुटेको हो । यसको लागि श्रममन्त्री कुँवरले असार २८ गते परराष्ट्र मन्त्रालयको वैदेशिक रोजगार विभाग तथा वैदेशिक रोजगार बोर्डको सचिवालय प्रतिनिधिहरुको छलफल गरेका थिए । उक्त छलफबाट साउदी अरबलगायतका रोजगार गन्तव्य मुलुकमा उपचार गराइरहेका र उपचार खर्च तिर्न नसकेका, भिसाको अवधि नाघिसकेका नेपालीहरुकोसमेत अवस्थालाई दृष्टिगत गर्दै उपचार, हेरचाह र व्यवस्थापनका लागि एक निर्देशिका तर्जुमा गरी काम अगाडि बढाइने निर्णय भएको थियो ।
त्यस्तै विदेशी अस्पतालहरुमा उपचाररत नेपाली नागरिकहरुको विवरण स्थायी ठेगाना, स्वास्थ्य अवस्था, रोगको प्रकृति, अस्पताल भर्ना मिति, भिषाको समयावधि लगायतका विषयमा अद्यावधिक गर्ने काम वैदेशिक रोजगार बोर्डको सचिवालयले गर्नेछ ।कामको सिलसिलामा विभिन्न गन्तव्य मुलुकमा पुगी काम गर्ने क्रममा बिरामी भएर अस्पतालमा उपचाररत नेपालीको संख्या धेरै ठूलो रहेकाले उनीहरुलाई स्वदेशमा ल्याउन कुनै पनि समस्या भए आवश्यक सहजीकरण गर्ने मन्त्रालयले जनाएको छ ।
