काठमाडौं- श्रम, रोजगार तथा सामजिक सुरक्षामन्त्री शेरबहादुर कुँवरले श्रम गन्तव्य मुलुकमा जाने नवनियुक्त नेपाली राजदूतहरुसँग वैदेशिक रोजगारका विषयमा छलफल गरेका छन् । उनले नेपाली कामदारहरुको सुरक्षाका विषयमा चासो व्यक्त गरे ।
बिहीबार श्रम मन्त्रालयमा साउदी अरेबियाका लागि नवनियुक्त राजदूत नवराज सुवेदी र दक्षिण अफ्रिकाका लागि नवनियुक्त राजदूत दानबहादुर तामाङसँग मन्त्री कुँवरले वैदेशिक रोजगारमा जाने नेपाली कामदारहरुको समस्या र सुरक्षाका विषयमा छलफल गरेका हुन् ।
मन्त्री कुँवरले दुवै राजदूतलाई नेपाली कामदारको कामको ग्यारेण्टी र सुरक्षाका विषयमा विशेष ध्यान दिन आग्रह गरे । ‘यहाँबाट जाने कामदारले उता भनेअनुसार काम नपाउने गुनासाहरु धेरै सुनिन्छन् । पठाउने व्यक्ति वा कम्पनीले उनीहरुलाई ठग्ने गरेका कारण बिचल्लीमा परेका घटनाहरु आइरहन्छन्, यसबारे विशेष ध्यान दिन म आग्रह गर्न चाहन्छु,’ उनले भने ।
मन्त्री कुँवरले कामदारलाई परेको समस्या समाधानका लागि दुतावासलाई चाहिने आवश्यक सहयोगका लागि मन्त्रालय तयार रहेको बताए । उनले विदेशमा नेपाली कामदारहरुको हुने गरेको मृत्युका विषयमासमेत गम्भीर भएर बुझ्नका लागि राजदूतहरुसँग आग्रह गरे ।
छलफलमा बोल्दै मन्त्रालयका सचिव एकनारायण अर्यालले विदेशमा कोमामा र अंगभंग भएर उपचार गराइरहेका नेपाली कामदारहरुको उद्धारका लागि सरकार गम्भीर रहेको र दूतावासहरुले सोहीअनुसार काम गर्नुपर्ने बताए । उनका अनुसार अहिले साउदीमा मात्रै २५ जना नेपाली कामदार कोमामा उपचारत रहेका छन् ।
वैदेशिक रोजगार विभागका महानिर्देशक शेषनारायण पौडेलले गत आर्थिक वर्षमा मात्रै सबैभन्दा बढी साउदी अरेबियामा एक लाख ८८ हजार ३९८ जना नेपाली रोजगारका लागि गएको बताए । उनले साउदीमा कामदार पठाउन नेपाल र साउदी सरकारबीच श्रम सम्झौता नभए पनि विभिन्न माध्यमबाट नेपालीहरु साउदी जाने संख्या ठूलो रहेको जानकारी दिए ।
छलफलमा बोल्दै साउदीका लागि नवनियुक्त राजदूत सुवेदीले साउदी सरकार र नेपालबीच श्रम सम्झौताका लागि पहल गर्ने बताए । अवैधानिक रुपमा कामदारहरु जाँदा विभिन्न जटिलताहरु रहेकाले दुवै सरकारबीच श्रम सम्झौता भएको खण्डमा त्यो न्यूनीकरण हुँदै जाने उनको भनाइ छ । उनले साउदीमा समस्यामा परेका कामदारहरुको उद्धार र राहातका लागि पहल गर्ने प्रतिबद्धता ब्यक्त गरे ।
यस्तै दक्षिण अफ्रिकाका लागि नयनियुक्त राजदूत तामाङले दक्षिण अफ्रिकामा नेपाली श्रमिक समस्यामा परेका खबर खासै नआए पनि कामदारहरुका विषयमा आफू सचेत रहेको बताए । उनले दक्षिण अफ्रिकासँगै केन्या, ताञ्जनिया, दक्षिण अफ्रिकामा जेल र अस्पतालमा रहेका नेपालीहरुको उद्धारका लागि पहल गर्ने बताए ।
