काठमाडौं- झण्डै पाँच महिनादेखि रोकिएको इजरायलमा नेपाली कामदार पठाउने प्रक्रिया पुनः सुरु भएको छ । इजरायलका दीर्घकालीन स्याहार केन्द्रका लागि सम्झौता गरेका नेपाली सहायक कामदारहरुमध्ये १०० जना कामदारको भिसासहित राहदानी काठमाडौंस्थित इजरायल दूतावासको कन्सुलर विभागबाट प्राप्त भएसँगै कामदार पठाउने प्रक्रिया पुनः सुरु भएको हो ।
गत फागुनपछि इजरायलमा कामदार लैजाने कार्य रोकिएको थियो ।वैदेशिक रोजगार विभागअन्तर्गत इजरायल र जापान शाखाले मंगलबार इजरायल जान भिसा प्राप्त गरेका १०० जना कामदारको सूचीसहित आवश्यक तयारीका लागि सूचना जारी गरेको छ । विभागका अनुसार भिसा प्राप्त गरेको कामदारले यही साउन ८ र ९ गते इजरायल उड्नुपर्नेछ ।
विभागले भिसा आएका कामदारहरुलाई राहदानी बुझ्न, उडानअनुसार बनाइने भाइबर ग्रुपमा आफ्नो नाम समावेश गराउन र कोभिड–१९ विरुद्धको खोप लगाएको विवरण पेस गर्न साउन ४ गते २ बजे ललितपुरको भैँसेपाटीस्थित व्यावसायिक तथा सीप विकास तालिम प्रतिष्ठानमा सम्पर्क गर्न आग्रह गरेको छ ।
विभागले साउन ८ र ९ गते हुने हवाई उडानका लागि टिकट बुकिङ गर्न सी लिंक होलिडेजमा राहदानीसहित तत्काल सम्पर्क गर्नुपर्ने उल्लेख गरेको छ । इजरायल उडानका लागि सन्राइज बैंकमार्फत भुक्तानी हुनेगरी कामदारले ५९ हजार ९९० रुपैयाँ हवाई भाडा बुझाउनुपर्ने छ ।
विभागले इजरायलको स्वास्थ्य मन्त्रालयको ५ जुलाइमा आएको पत्रलाई उद्धृत गर्दै इजरायल उड्ने नेपाली कामदारले उडान गर्नुपूर्व ७२ घण्टाभित्र कोभिडको पिसिआर परीक्षण गराउनुपर्ने उल्लेख गरेको छ । उक्त परीक्षणमा रिपोर्ट ‘नेगेटिभ’ आएको अवस्थामा मात्रै इजरायलका लागि उडान गर्न पाइने जानकारी दिइएको छ ।
कोभिड परीक्षण परिणाम ‘नेगेटिभ’ वा ‘पोजेटिभ’ जे आए पनि सी लिंक होलिडेजलाई जानकारी दिनुपर्नेछ । पीसीआर परीक्षण नेगेटिभ आउनासाथ ग्रिन पासका लागि प्रत्येक कामदारले अनलाइन फाराम भर्नुपर्ने व्यवस्था गरिएको विभागले जनाएको छ ।
विभागको इजरायल र जापान शाखाका संयोजक तथा निर्देशक श्रीचन्द्र साहले श्रम स्वीकृतिका लागि अनलाइन आवेदन दिन अनिवार्य जीवन बिमा गरेको हुनुपर्ने बताए । उनले यतिमात्र नभई इजरायल जान अनुमति पाएका प्रत्येक नेपाली कामदारले वैदेशिक रोजगार कल्याणकारी कोषको रकम तिरेको हुनुपर्ने जानकारी दिए ।
यस्तै स्वास्थ्य परीक्षणमा फिट भएका तर वैदेशिक रोजगार सूचना व्यवस्थापन प्रणाली (फेइम्स)मा फिट भएको विवरण नजनाइएको पाइएमा कामदारले तत्कालै विवरण अद्यावधिक गराइदिनका लागि सम्बन्धित स्वास्थ्य संस्थालाई अनुरोध गर्नसक्ने साहको भनाइ छ ।
नेपाल सरकार र इजरायल सरकारबीच २०७७ माघ महिनामा एक हजार नेपाली सहायक कामदार लैजाने सम्झौता भएको थियो । सोही सम्झौता अनुसार विभागले आवेदन आह्वान गरेर एक हजार १७५ जनाको अन्तिम सूची निकालेको थियो । जसमध्ये गत पुस र माघमा गरी २९७ जना इजरायल पुगिसकेका छन् ।
बाँकी रहेका कामदार अहिलेसम्म जान पाएका थिएनन् । बाँकी कामदारमध्ये १०० जनालाई तत्कालै इजरायल जाने अवसर आएको हो । लामो समय रोकिएको कामदार पठाउने प्रक्रिया सुरु भएसँगै विभागले द्रुत गतिमा काम अगाडि बढाएको छ ।
यसअघि इजरायलको परराष्ट्र मन्त्रालयका कर्मचारीको आन्दोलनका कारण नेपाली कामदार लैजाने प्रक्रिया रोकिएको थियो । यसबारे नेपालस्थित इजरायली दूतावासले कर्मचारीको आन्दोलनका कारण प्रक्रिया अवरुद्ध भएको र चाँडै नै सुरु गरिने नेपाल सरकारलाई जानकारी गराएको थियो ।
वैदेशिक रोजगारीका लागि आकर्षक गन्तव्य मानिएको इजरायल जाने नेपाली कामदारले मासिक १६ सय अमेरिकी डलर (दुई लाख रुपैयाँ) पारिश्रमिक पाउँछन् ।
प्रकाशित मिति: बुधबार, साउन ४, २०७९ ०८:२६
-1752335779.jpg)
