काठमाडौं- राहदानी विभागले एक वर्षभन्दा बढी म्याद बाँकी भएका राहदानी नवीकरण नहुने जनाएको छ । विभागले एक सूचना जारी गरी एक वर्षभन्दा कम म्याद भएको राहदानी मात्र नवीकरण हुने प्रस्ट पारेको हो ।
केही एजेन्सीले दुई वा तीन वर्षभन्दा बढी म्याद भएका राहदानीवाहकलाई मात्र भिसासम्बन्धी प्रक्रिया अगाडि बढाउने भन्दै नवीकरणका लागि पठाउने गरेको भन्दै त्यस्तो नगर्न विभागले सचेत गराएको छ ।
एक वर्षभन्दा बढी म्याद भए नवीकरणका लागि निवेदन नदिन विभागले आग्रह गरेको छ । विभागले राहदानी ऐन, २०७६ को दफा (१२) मा राहदानीवाहकको नाममा जारी भएको राहदानीको बहाल अवधि एक वर्षभन्दा बढी बाँकी रहेको अवस्थामा राहदानी जारी नगर्ने व्यवस्था रहेको स्पष्ट पारेको छ ।
‘हाल केही सेवाग्राहीहरुले यन्त्रवाचक राहदानी (एमआरपी) को बहाल म्याद एक वर्षभन्दा बढी रहेको अवस्थामा पनि विभिन्न एजेन्सीहरुले दुई वा तीन वर्षभन्दा बढी बहाल म्याद भएको राहदानी उपलब्ध गराएमा मात्र विदेश जान भिसासम्बन्धी प्रक्रिया अघि बढाउने जानकारी दिएकोले नयाँ विद्युतीय राहदानी बनाउनुपर्ने भनी विभागमा आवेदन दिन आउने र नयाँ राहदानी बनाइदिन अनुरोध गर्ने गरेको पाइएको छ,’ विभागले जारी गरेको सूचनामा भनिएको छ, ‘राहदानी ऐनअनुसार राहदानीको बहाल अवधि एक वर्षभन्दा बढी बाँकी रहेको अवस्थामा राहदानी नवीकरण नहुने तथा नयाँ राहदानीको लागि आवेदन गर्न नसकिने भएकोले राहदानी विभाग, जिल्ला प्रशासन कार्यालयहरु र विदेशस्थित नेपाली नियोगहरुमा आवेदन नगर्नुहुन अनुरोध छ ।’
साथै, एमआरपीको बहाल अवधि एक वर्षभन्दा कम भएमा मात्र राहदानी नवीकरणका लागि विद्युतीय राहदानीमा आवेदन गर्न सकिने विभागले जनाएको छ । ‘राहदानीको बहाल म्याद छ महिनाभन्दा बढी भएमा अन्तर्राष्ट्रिय यात्रा गर्न सकिने हुन्छ ।
राहदानी आफूलाई आवश्यक नहुँदाको अवस्थामा बहाल म्याद एक वर्षभन्दा कम वा बहाल म्याद समाप्त भए पनि तुरुन्त बनाउनु नपर्ने र यसरी नबनाउँदा कुनै अतिरिक्त शुल्क नलाग्ने भएकोले आफूलाई आवश्यक पर्दामात्र राहदानी बनाउनका लागि आवेदन गर्न सकिनेछ,’ विभागको सूचनामा उल्लेख छ ।
