काठमाडौं- गएको आर्थिक वर्षमा वैदेशिक रोजगार विभागमा उजुरीको संख्या दोब्बरभन्दा बढीले बढ्दा दाबी रकम भने घटेको छ । अघिल्लो आर्थिक वर्षको तुलनामा आव २०७८/७९ मा एक हजार ७४२ उजुरी दर्ता भएको विभागले जानकारी दिएको छ । उक्त संख्या आव २०७७/७८ को तुलनामा ९६२ ले बढी हो । उक्त आवमा ७८० वटा उजुरी दर्ता भएका थिए ।
वैदेशिक रोजगारीसँग सम्बन्धित उजुरीहरु विभागमा दर्ता हुने गरेको छ । यस्ता उजुरीमाथि विभागले आवश्यक कारबाही गर्ने गर्दछ । गत आवमा दर्ता भएका उजुरीमाथि छानबिन गरी विभागले ८७ वटा मुद्दा अदालतमा दायर गरेको जनाएको छ ।
यसैगरी ४१५ वटा उजुरीमा मिलापत्र भएको तथ्यांक विभागले सार्वजनिक गरेको छ ।विभागका अनुसार गत आवमा कूल ६५ करोड ७१ लाख ५८ हजार ७६० रुपैयाँ बराबर रकम ठगी भएको भन्दै विभागमा दाबी परेको थियो । जसमध्ये धरौटी र मिलापत्रबाट ३१ करोड ७९ लाख १८ हजार ६८५ रुपैयाँ रकम पीडितलाई फिर्ता गराइएको विभागले जानकारी दिएको छ ।
यसैगरी २२ करोड ६८ लाख ९४ हजार ४५० रुपैयाँ रकम अदालतमा बिगो मागदाबी गरिएको छ ।विभागमा परेको दाबी रकम भने अघिल्लो आवको तुलनामा घटेको पाइएको छ । आव २०७७/७८ मा कूल एक अर्ब ३१ करोड ५४ लाख ९५ हजार २०९ रुपैयाँ ठगीको दाबीसहित विभागमा उजुरी परेको थियो । आव २०७८/७९ मा यस्तो दाबी ६५ करोड ७१ लाख ५८ हजार ७६० रुपैयाँ मात्रै परेको हो ।
आव २०७७/७८ मा दाबी परेकोमध्ये २१ करोड सात लाख ३५ हजार १२० रुपैयाँ धरौटी तथा मिलापत्रबाट भराइएको थियो । यस्तै, १७ करोड ९२ लाख ५२ हजार ३७० रुपैयाँ बिगो कायम गरी अदालतमा मुद्दा दायर गरिएको थियो ।
गत आवमा अघिल्लो आवको तुलनामा वैदेशिक रोजगारीमा जानेको संख्या पछिल्लो पाँच वर्षयताकै उच्च कायम भएको विभागको तथ्यांकमा उल्लेख छ । आव २०७७/७८ को तुलनामा आव २०७८/७९ मा चार लाख ६१ हजार ८०५ जना बढी वैदेशिक रोजगारीमा गएका थिए । पछिल्लो आवमा वैदेशिक रोजगारीमा जान कूल छ लाख २८ हजार ५०३ जनाले श्रम स्वीकृति लिएको विभागले जनाएको छ ।
प्रकाशित मिति: मंगलबार, साउन ३, २०७९ ०९:०२
-1745656903.jpeg)