काठमाडौं- मलेसियामा पछिल्लो समय विदेशी श्रमिकहरुको अभाव हुने संकेत देखिएको छ । मलेसियाको स्थानीय सञ्चारमाध्यम मलेमेलका अनुसार मलेसियाले छिट्टै कामदारको अभाव खेप्नुपर्नेछ । केही क्षेत्रमा अहिले नै कामदारको अभाव देखिएको छ ।
मलेसियाले कोभिड–१९ महामारीका कारण विदेशी कामदार भित्र्याउन नपाएको उल्लेख गरिएको छ । कामदारको अभावकै कारण विदेशी लगानीकर्ताहरुले मलेसियामा लगानीमा ध्यान नदिएको भन्दै त्यहाँका अर्थशास्त्रीहरुले पनि समयमै यसमा ध्यान दिन मलेसिया सरकारलाई सुझाव दिएका छन् ।
मलेमेलमा जनाइएअनुसार अहिले नै कृषि तथा खाद्यान्नसँग सम्बन्धित फार्म तथा उद्योगमा विदेशी कामदारको अभाव देखिएको छ । कोभिडका कारण प्रभावित बनेको त्यहाँको कृषि क्षेत्रमा विस्तारै सुधार आउन थाले पनि अहिले कामदारको अभावले गति लिन नसकेको बताइएको छ ।
फिलिपिन्स, इण्डोनेसिया, भियतनामलगायत मुलुकबाट आउने कामदारहरुको संख्यामा पनि भारी कटौती भएको समाचारमा उल्लेख छ । ती मुलुकमा रोजगारीको अवसरमा सिर्जना भएका कारण मलेसिया आउने कामदारको संख्यामा कमी भएको बताइएको छ ।
त्यस्तै मलेसिया सरकारले गत मे १ देखि स्वदेशी र विदेशी दुवै श्रमिकलाई दिने पारिश्रमिक बढाएका कारण पनि विदेशी कामदारको संख्यामा कमी आएको बुझिएको छ । पारिश्रमिक वृद्धिका कारण रोजगारदाता कम्पनीहरुले चाहेअनुरुप विदेशी कामदार ल्याउन सकेका छैनन् ।
यसले पनि विदेशी कामदारको अभाव खड्किने विज्ञहरुले बताएका छन् । मलेसियाले स्वदेशी तथा विदेशी कामदारलाई मासिक १५ सय रिंगिटभन्दा तल तलब दिएर काममा राख्न नपाइने नीति अवलम्बन गरेको छ ।
विदेशी कामदारहरुको आकर्षक गन्तव्य मानिँदै आएको मलेसियामा आर्थिक विकासले फड्को मारेको छ । नेपालीहरुको श्रम गन्तव्य मुलुकहरुमध्ये मलेसिया एक प्रमुख देश हो । गएको आर्थिक वर्ष २०७८/७९ मा ३५ हजार ४४१ जना नेपाली मलेसिया गएको वैदेशिक रोजगार विभागको तथ्यांक छ ।
मलेसियाले मागअनुसार नेपालबाट कामदार लैजान सकेको छैन । मलेसिया विदेशी लगानीकर्ता र विदेशी श्रमिक दुवैका लागि आकर्षक गन्तव्य भए पनि पछिल्लो समय गिरावट आएको म्यानपावर व्यवसायीको भनाइ छ ।
