काठमाडौं- श्रम, रोजगार तथा सामाजिक सुरक्षामन्त्री शेरबहादुर कु“वरले राष्ट्रिय तथा अन्तर्राष्ट्रिय तहमा रहेका सबै श्रमिकको योगदानको उचित कदर हुनेगरी काम गर्ने बताएका छन् । सामाजिक सुरक्षा कोष र श्रम तथा व्यवसायजन्य सुरक्षा विभागका बारेमा मन्त्रालयमा ‘ब्रिफिङ’ लिने क्रममा मन्त्री कुँवरले वैदेशिक रोजगारीमा गएका युवाले पठाएको विप्रेषण (रेमिट्यान्स)बाट मुलुकमा वैदेशिक मुद्राको सञ्चिति बढ्ने हुँदा उनीहरूको उचित मूल्यांकन गरिने बताए ।
श्रमिकको हकहित संरक्षणका लागि ट्रेड युनियन र राजनीतिक दलका भ्रातृ संगठन क्रियाशील हुनुपर्नेमा जोड दिँदै उनले भने, ‘म श्रमिकको न्यायको पक्षमा छु । त्यसैले बन्द, हडताल, तालाबन्दीभन्दा पनि शान्तिपूर्ण तरिकाले श्रमिकलाई न्यायको अनुभूति हुने काम गरौँ ।’
उनले श्रमिकलाई काम गर्ने वातावरण सहज बनाउनका लागि कानुनमा भएका केही प्रावधानलाई संशोधन गर्न खाँचो औँल्याए । खाडी मुलुकमा मात्रै नभएर भारतमा रहेका श्रमिकका समस्यालाई पनि केन्द्रित गर्न उनले सम्बन्धित पक्षलाई निर्देशन दिए ।
कार्यक्रममा कोषका कार्यकारी निर्देशक कपिलमणि ज्ञवालीले कोषले अहिलेसम्म गरेका काम र भएका उपलब्धिका साथै आगामी दिनमा गर्न सकिने कामका बारेमा जानकारी गराएका थिए । श्रम तथा व्यवसायजन्य सुरक्षा विभागका महानिर्देशक उमाकान्त आचार्यले आफ्नो विभागअन्तर्गत अहिलेसम्म भए गरेका कार्य सम्पादनबारे जानकारी दिए ।
प्रकाशित मिति: सोमबार, असार २०, २०७९ ०८:३३
-1752335779.jpg)
