काठमाडौं- श्रम, रोजगार तथा सामाजिक सुरक्षामन्त्री कृष्णकुमार श्रेष्ठले अझै केही वर्ष वैदेशिक रोजगारीलाई प्राथमिकता दिनुपर्ने बाध्यता रहेको बताएका छन् । आप्रवासी महिला कामदार समूह (आमकास नेपाल)ले अन्तर्राष्ट्रिय घरेलु श्रमिक दिवसको अवसरमा राजधानीमा आयोजना गरेको कार्यक्रममा मन्त्री श्रेष्ठले मुलुकमै रोजगारी सिर्जना गर्न नसकेका कारण युवाहरु विदेशिनुपर्ने अवस्था रहेकोले अझै केही वर्ष वैदेशिक रोजगारीलाई नै प्राथमिकता दिनुपर्ने बताएका हुन् ।
नेपाली युवा जनशक्तिलाई सधैं वैदेशिक रोजगारमा पठाएर उपलब्धि हासिल गर्न नसकिने भन्दै मन्त्री श्रेष्ठले मुलुकमै रोजगारी सिर्जना गर्नुपर्ने चुनौती रहेको बताए । उनले भने, ‘वैदेशिक रोजगारीको विकल्प भनेकै स्वदेशमा रोजगारी सिर्जना गर्नु हो । तर, अहिले नै हामी रोजगारी सिर्जना गर्न सक्ने अवस्थामा छैनौं । यस्तो परिस्थितिमा अझै केही वर्ष वैदेशिक रोजगारीलाई उपयोग गर्नुपर्ने अवस्था कायमै छ ।’ घरेलु श्रमिकका रुपमा काम गर्न विदेश जाने नेपालीहरु, अझ त्यसमाथि महिलाहरुको अवस्था झन् दयनीय र कठिन अवस्थाबाट गुज्रिरहेको मन्त्री श्रेष्ठले उल्लेख गरे ।
उनले वैदेशिक रोजगारमा पहिलेदेखि घरेलु मात्र नभई अन्य क्षेत्रमा पनि ठूलो संख्यामा अदक्ष श्रमिक जाने गरेको बताए । मन्त्री श्रेष्ठले सीप जानेर होस् वा नजानेर जस्तोसुकै अवस्थामा वैदेशिक रोजगारीको लागि जाने श्रमिकले दुःख पाउनु भएन, ठगिनु भएन भन्ने उद्देश्यका साथ सरकारले श्रम नीतिमा नै पुनरवलोकन गर्न लागिएको बताए । ‘सरकारले श्रमिकको पक्षमा हुनेगरी काम गरिरहेको छ,’ उनले भने, ‘सुधारका प्रयासहरु भइरहेका छन्, वैदेशिक रोजगारमा जानेहरुलाई दक्ष बनाएर पठाउन सके व्यक्ति र मुलुक दुवैलाई फाइदा हुन्छ, हाम्रो श्रमको मूल्य पनि बढ्छ ।’ युवाहरुलाई वैदेशिक रोजगारमा जाने मात्र नभई आफूले सिकेको सीपलाई स्वदेश फर्किएपछि उपयोग गर्न मन्त्री श्रेष्ठले आग्रह गरे ।
बिचौलियाको परिबन्दमा परेर गैरकानुनी बाटो हु“दै विदेशमा पुगेर अलपत्र परेका, ठगिएका घरेलु महिला कामदाहरुको सहयोग र उद्धारका लागि समन्वयकारी भूमिका निर्वाह गरेको भन्दै मन्त्री श्रेष्ठले आमकास नेपालको प्रशंसा गरे ।कार्यक्रममा महिला आयोगकी सदस्य कृष्णकुमारी खतिवडाले घरेलु श्रमिकको रुपमा विदेश पुग्ने महिलाहरु बढी असुरक्षित रहेको बताइन् । उनले सुरक्षाको प्रत्याभूतिसहित घरेलु श्रमलाई मर्यादित बनाउन सरकारले आवश्यक तयारी गर्नुपर्ने धारणा व्यक्त गरिन् ।
कार्यक्रममा मानव बेचबिखन अनुसन्धान ब्युरोका प्रवक्ता दानबहादुर मल्लले घरेलु श्रमिकका रुपमा काम गर्न जान बन्देज लगाएपछि अवैधानिक बाटो भएर जानेहरुको संख्या बढेको र त्यसरी जानेहरु नै बढी समस्यामा परेको बताए । उनले वैदेशिक रोजगारलाई सुरक्षित र मर्यादित बनाउन सबैले पहल गर्नुपर्ने धारणा राख्दै विदेश जान चाहनेहरुलाई वैधानिक बाटो प्रयोग गर्न आग्रह गरे ।
