काठमाडौं- मुलुकको दोस्रो अन्तर्राष्ट्रिय विमानस्थलको रुपमा सञ्चालनमा आएको भैरहवास्थित गौतम बुद्ध अन्तर्राष्ट्रिय विमानस्थलबाट जजिरा एयरले उडान थालेको एक महिना पूरा हुँदै छ । यही जेठ २ गतेबाट अन्तर्राष्ट्रिय उडान सुरू भएको विमानस्थलमा साताको तीनपटक उडान भर्दै आएको जजिराले यस अवधिमा झण्डै तीन हजार यात्रुलाई सेवा दिएको छ ।
एयरलाइन्सका अनुसार एक महिनाको अवधिमा दुई हजार ७८० यात्रुले भैरहवा–कुवेत, कुवेत–भैरहवा आवातजावत गरेका छन् । एयरलाइन्सले हालसम्म १३ उडान भर्दा एक हजार ६४४ यात्रु भैरहवाबाट बाहिरिएका छन् भने एक हजार १३६ जना भित्रिएको नेपालस्थित जनरल सेल्स एजेण्ट (जिएसए) सोसाइटी इन्टरनेसनलले जनाएको छ ।
जजिरा अहिले सातामा तीनवटा उडान भरिरहेको छ । यात्रु क्षमता १७४ जना भए पनि १५० जना यात्रु बोकेर उडान भरिरहेको जनाइएको छ ।जजिराले वैदेशिक रोजगारीमा जाने कामदारलाई आफ्नो यात्रु बनाउने लक्ष्य लिएका कारण भैरहवाबाट अन्तर्राष्ट्रिय उडान सुरु भएपछि त्यस क्षेत्रबाट वैदेशिक रोजगारीमा जानेहरुका लागि काठमाडौं आउनुपर्ने बाध्यता हटेको छ । विदेशबाट घर फर्कंदा सीधै भैरहवामा अवतरण गर्न पाएका छन् ।
यद्यपि, श्रम स्वीकृतिको काम काठमाडौंबाट मात्र हुने हुँदा अहिलेसम्म काठमाडौंबाटै यात्रु लगेर उडान भरिरहेको जजिराले जनाएको छ । सञ्चालनमा आएदेखि नै एयरलाइन्सले सधैं काठमाडौंबाट यात्रु लगेर उडान गर्न नसकिने जनाउँदै भैरहवाबाटै श्रमिकलाई श्रम स्वीकृति दिने व्यवस्था मिलाउन सरकारस“ग माग गर्दै आएको छ ।
यता, एयरलाइन्सको मागअनुसार श्रम, रोजगार तथा सामाजिक सुरक्षा मन्त्रालयले भैरहवाबाटै श्रम स्वीकृति दिने व्यवस्था छिट्टै कार्यान्वयनमा ल्याउने तयारी भइरहेको जनाएको छ ।
गौतम बुद्ध विमानस्थलबाट पहिलो व्यावसायिक परीक्षण उडान गरिरहेको जजिराले यात्रुको चाप बढ्ने देखेपछि अबको एक महिनाभित्र सातै दिन उडान थाल्ने तयारी गरिरहेको जनाएको छ ।
प्रकाशित मिति: बुधबार, असार १, २०७९ १०:५२
-1745656903.jpeg)