काठमाडौं- वैदेशिक रोजगारीमा रहेका नेपालीहरुका लागि आगामी चार महिनाभित्र साधारण सेयर (आइपिओ)भर्न आरक्षणको व्यवस्था हुने भएको छ ।सरकारले आगामी आर्थिक वर्ष २०७९/८० को नीति तथा कार्यक्रम र बजेटमा घोषणा गरेको १० प्रतिशत आरक्षण अबको चार महिनाभित्र कार्यान्वयनमा आउने भएको हो ।
नेपाल धितोपत्र बोर्डका अध्यक्ष रमेशकुमार हमालले बजेटमा घोषणा भएअनुसार वैदेशिक रोजगारीमा रहेका नेपालीलाई चार महिनाभित्र आइपिओआरक्षणमा सहभागी गराउने प्रणालीको व्यवस्था गर्ने बताए ।
बोर्डको ३०औं वार्षिकोत्सवको अवसरमा बुधबार आफ्नो धारणा राख्दै उनले चार महिनाभित्र साना तथा मझौला कम्पनीहरूका लागि ‘एसएमई प्लेटफर्म’ सञ्चालनमा ल्याएर रोजगारीका लागि विदेशमा रहेका नेपालीलाई सेयरमा लगानी गर्ने व्यवस्था लागू गरिने बताए ।
हमालले धितोपत्र बोर्डले लगानीकर्ताको समस्या बुझेको र समाधानका लागि पहल भइरहेको बताए । ‘हाल सेयर कर्जामा रहेको व्यवस्थाको विषयमा लगानीकर्ताबाट आइरहेको गुनासो हामीले बुझेका छौं,’ उनले भने । अहिले लगानीकर्ताको मानोविज्ञान उकास्न आवश्यक भइसकेकोप्रति उनले जोड दिए ।
हमालले अबको चार महिनामा साना तथा मझौला कम्पनीलाई छुट्टै कारोबार गर्ने प्रणाली ‘एसएमई प्लेटफर्म’ सञ्चालनमा ल्याउने प्रतिबद्धता व्यक्त गरे । उनले भने, ‘आवश्यक पूर्वतयारी गरेर वैदेशिक रोजगारीमा गएकालाई प्राथमिक सेयरमा छुट्याइएको १० प्रतिशत सेयर पाउने अवस्था बनाउन कटिबद्ध छु ।’ हमालले गैरआवासीय नेपाली (एनआरएन)लाई सोही समयदेखि आरक्षणमा समावेश गरिने बताए ।
प्रकाशित मिति: बिहीबार, जेठ २६, २०७९ ११:१०
-1745656903.jpeg)