काठमाडौं- सरकारले वैदेशिक रोजगारीमा गएका श्रमिकको समस्या र गुनासो सम्बोधन गर्न गन्तव्य मुलुकका श्रम सहचारी र काउन्सिलरलाई निर्देशन दिएको छ । श्रम, रोजगार तथा सामाजिक सुरक्षामन्त्री कृष्णकुमार श्रेष्ठले श्रम गन्तव्य मुलुकमा काम गरिरहेका श्रमिकका समस्या र गुनासो सम्बोधन गर्न उक्त निर्देशन दिएका हुन् ।
साउदी अरब, युएई, बहराइन र कतारका लागि नियुक्त भएका काउन्सिलर(श्रम) र श्रम सहचारीहरुको अभिमुखीकरण कार्यक्रमको समापनका अवसरमा मन्त्री श्रेष्ठले श्रमिकहरु दूतावासमा आउँदा पनि आफ्नो समस्या नसुनिएको गुनासो रहेको बताउँदै श्रमिकका समस्या समाधानका लागि प्रभावकारी भूमिका खेल्न निर्देशन दिए । श्रमिकको हक अधिकारको संरक्षण, समस्या परेको अवस्थामा उद्धार तथा रोजगार दाता र कामदारबीच भएको विवाद समाधानमा काउन्सिलर र श्रम सहचारीहरुले भूमिका खेल्नु पर्नेमा मन्त्री श्रेष्ठले जोड दिए ।
सोही कार्यक्रममा मन्त्रालयका सचिव एकनारायण अर्यालले काउन्सिलर र श्रम सहचारीहरु विदेशी कानुन तथा आप्रवासी कामदारको मुद्दाबारे जानकार हुनुपर्ने बताए ।अभिमुखीकरणमा वैदेशिक रोजगार व्यवस्थापन प्रणाली, श्रम आप्रवासन, द्विपक्षीय श्रम सम्झौता, श्रम कूटनीति, वैदेशिक रोजगारसम्बन्धी कानुनलगायतका विषयमा विज्ञहरुले प्रशिक्षण दिएका थिए ।
श्रम गन्तव्य मुलुकहरुमा कामदारको सहयोगका लागि श्रम सहचारी राख्न सकिने कानुनी व्यवस्था अनुसार मन्त्रालयले साउदी अरबको राजधानी रियादको काउन्सिलरमा देवेन्द्र कार्की र युएईका लागि दीनबन्धु सुवेदी तथा बहराइनको श्रम सहचारीमा जमुना काफ्ले र कतारका लागि कृष्ण पौडेललाई नियुक्त गरेको छ ।
काउन्सिलर तथा सहचारी छनोट तथा नियुक्तिसम्बन्धी कार्यविधि तथा मापदण्ड–२०७३ बमोजिम मूल्यांकनबाट मन्त्रीस्तरीय निर्णयले सिफारिस गरिएको हो । मन्त्रालयले माघ १९ गते सूचना प्रकाशित गर्दै ‘काउन्सिलर तथा श्रम सहचारी छनोट तथा नियुक्तिसम्बन्धी कार्यविधि तथा मापदण्ड–२०७३’ अनुसार आवेदन माग गरेको थियो ।
प्रकाशित मिति: आइतबार, जेठ २२, २०७९ १४:३३
-1745656903.jpeg)