काठमाडौं- कतारमा तापक्रम बढेसँगै दिउँसोको समयमा खुला क्षेत्रमा काम गर्न/गराउन प्रतिबन्ध लगाइएको छ । कतारको श्रम मन्त्रालयले यही १ जुनदेखि १५ सेप्टेम्बरसम्मका लागि यस्तो प्रतिबन्ध लगाएको हो ।
कामदारहरुलाई अधिक तापक्रमजन्य समस्या आउन नदिन बिहान १० बजेदेखि दिउ“सो ३ः३० बजेसम्म खुला क्षेत्रमा काम गर्न/गराउन नपाइने नियम लागू गरिएको कतारको दोहास्थित नेपाली राजदुतावासले जानकारी दिएको छ । उक्त समयमा नियम उल्लंघन गरी रोजगारदाताले काममा लगाए त्यहाँको श्रम मन्त्रालयमा उजुरी दिन पनि राजदुतावासले आग्रह गरेको छ ।
‘कामदारहरुलाई अधिक तापक्रमजन्य समस्या आउन नदिन कतारको श्रम मन्त्रालयको निर्णयानुसार १ जुनदेखि १५ सेप्टेम्बरसम्म बिहान १० बजेदेखि अपराह्न ३ः३० बजेसम्म खुला क्षेत्रमा काम गर्न/गराउन प्रतिबन्ध लगाइएको सबैमा विदितै छ,’ राजदूतावासद्वारा बुधबार जारी सूचनामा उल्लेख छ, ‘उल्लिखित निर्णयको उल्लंघन भएको अवस्थामा कतारको श्रम मन्त्रालयमा उजुरी दिन सकिने प्रावधानसमेत सोही निर्णयमा उल्लेख रहेको व्यहोरा सम्बन्धित सबैलाई जानकारी गराइन्छ ।’
खाडी मुलुक कतार नेपालीहरुको प्रमुख श्रम गन्तव्यमध्येको एक हो । वैदेशिक रोजगार विभागको तथ्यांकअनुसार गत फागुन मसान्तसम्म १२ लाख ७८ हजारभन्दा बढी नेपाली श्रम स्वीकृति लिएर कतारमा रोजगारीका लागि गएका छन् ।
