काठमाडौं- कोरियाली अन्तर्राष्ट्रिय सहयोग नियोग (कोइका)ले रोजगार अनुमति प्रणाली (इपिएस) मार्फत कोरिया गई फर्किएका नेपालीका लागि सञ्चालन हुने पुनःएकीकरण परियोजनाका लागि नेपाललाई आठ मिलियन अमेरिकी डलर (करिब ९६ करोड रुपैयाँ)अनुदान उपलब्ध गराएको छ ।
नेपाल सरकारको बजेट प्रणालीमार्फत परिचालन हुनेगरी उक्त रकम प्राप्त भएको श्रम, रोजगार तथा सामाजिक सुरक्षा मन्त्रालयले जानकारी दिएको छ ।उक्त रकम सम्बद्ध सरकारी निकायको क्षमता अभिवृद्धि, पुनःएकीकरणसम्बन्धी सूचनामा पहुँच, कोरियाबाट फर्केर आएका नेपालीको उद्यमशीलतासम्बन्धी क्षमता अभिवृद्धि र वित्तीय पहुँचमा खर्च हुने मन्त्रालयको भनाइ छ ।
यसैबीच श्रममन्त्री कृष्णकुमार श्रेष्ठ र कोइकाका नेपालस्थित देशीय निर्देशक सुङहुन कोबीच सोमबार शिष्टाचार भेटवार्ता भएको छ ।मन्त्रालयमा भएको भेटमा उनीहरुबीच इपिएसमार्फत कोरिया गई फर्किएका नेपालीका लागि सञ्चालन हुने परियोजनाका साथै नेपाल र दक्षिण कोरिया सरकारबीचको सम्भावित साझेदारीका विषयमा विचारविमर्श भएको थियो ।कोइकाले आठ मिलियन अमेरिकी डलर सहयोग प्रदान गरेकोमा मन्त्री श्रेष्ठले धन्यवाद ज्ञापन गरे ।
कोरियामा ६५ हजारभन्दा बढी नेपाली श्रमिक इपिएसमार्फत गएका छन् । उनीहरू स्वदेश फर्किएपछि पुनःएकीकरण र सीपमूलक तालिमका लागि कोइकाले सहयोग उपलब्ध गराएको हो ।मन्त्री श्रेष्ठले आगामी आर्थिक वर्षमा सातवटै प्रदेशमा सीप विकास तालिम प्रतिष्ठान सञ्चालन गर्ने सरकारको योजना रहेको बताउँदै कोरिया सरकारसँग सहकार्यका लागि इच्छुक रहेको उल्लेख गरेको मन्त्रालयले जनाएको छ ।
दक्षिण कोरिया सरकारले इपिएसअन्तर्गत रोजगारीबाट करार अवधि सकिएर फर्किएका कामदारलाई पुनःएकीकरण तालिम सञ्चालन गर्न गण्डकी, बागमती र लुम्बिनी प्रदेशमा पूर्वाधार निर्माण गर्नेछ । मन्त्री श्रेष्ठले बताए ।
