काठमाडौं- चालु आर्थिक वर्षका नौ महिनामा साढे दुई लाखभन्दा बढी नेपाली श्रम स्वीकृति लिएर वैदेशिक रोजगारीमा गएका छन् । नेपाल राष्ट्र बैंकको प्रतिवेदनअनुसार चैत मसान्तसम्म अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या दुई लाख ५६ हजार ३१ रहेको छ । यो वर्ष श्रम स्वीकृति लिएर विदेशिनेको संख्या उल्लेख्य बढेको पाइएको हो ।
अघिल्लो आर्थिक वर्षको सोही अवधिमा यस्तो संख्या ७४.९ प्रतिशतले घटेको थियो । चालु आवको पुस महिनामा सबैभन्दा धेरै ३६ हजार ४३१ जना अन्तिम श्रम स्वीकृति लिएर विदेशिएका थिए । त्यसैगरी मंसिरमा ३४ हजार ७०० र माघ महिनामा ३२ हजार ५८९ जनाले अन्तिम श्रम स्वीकृति लिएका थिए । सबैभन्दा कम पहिलो महिना साउनमा १३ हजार ८०० जना श्रम स्वीकृति लिएर विभिन्न मुलुकमा गएका थिए ।
पछिल्लो महिना चैतमा २८ हजार १३१ जना श्रम स्वीकृति लिएर विदेशिएका छन् । चैतमा विदेशिनेको संख्या फागुनमा भन्दा बढी हो । फागुनमा २७ हजार ७९८ जनाले अन्तिम श्रम स्वीकृति लिएका थिए । यस्तै, भदौमा २४ हजार ६९२, असोजमा २७ हजार ८२४, कात्तिकमा ३० हजार ६६ जनाले अन्तिम श्रम स्वीकृति लिएर विदेशिएको तथ्यांक छ ।
यता वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा १९९.९ प्रतिशतले बढेको छ । चैत मसान्तसम्मको अवधिमा दुई लाख छ हजार ६२९ जनाले पुनः श्रम स्वीकृति लिएको तथ्यांक छ । अघिल्लो वर्षको सोही अवधिमा यस्तो संख्या ६०.७ प्रतिशतले घटेको थियो ।
विश्वव्यापी महामारीको रुपमा फैलिएको कोरोना भाइरसको संक्रमणका कारण प्रभावित बनेको वैदेशिक रोजगारीको क्षेत्र पछिल्लो समय लयमा फर्कन लागेको तथ्यांकले पुष्टि गर्छ । नेपालका साथै गन्तव्य मुलुकहरुमा कोरोना संक्रमण सामान्य बन्दै गएका कारण यो क्षेत्रमा सुधार देखिएको हो ।
समीक्षा वैदेशिक रोजगारीमा गएकाहरुले पठाएको रेमिट्यान्समा पनि सुधार आएको छ । यद्यपि, अघिल्लो वर्षको सोही अवधिको तुलनामा ०.६ प्रतिशतले कमी आई सात खर्ब २४ अर्ब ७४ करोड रुपैयाँ कायम भएको राष्ट्र बैंकको तथ्यांकमा उल्लेख छ । अघिल्लो वर्षको सोही अवधिमा रेमिट्यान्स १६.५ प्रतिशतले बढेको थियो ।
प्रकाशित मिति: आइतबार, जेठ १, २०७९ ०९:५५
-1745656903.jpeg)