काठमाडौं- पछिल्लो समय वैदेशिक रोजगारीका लागि इजाजतपत्र लिएका म्यानपावर कम्पनीहरुले इजाजतपत्र रद्द गर्न निवेदन दिने क्रम बढेको छ । वैदेशिक रोजगार विभागमा इजाजतपत्र रद्द गर्न लागि ती निवेदन परेका हुन् ।
पछिल्लोपटक दुईवटा कम्पनीले इजाजतपत्र रद्दका लागि निवेदन दिएको विभागले आइतबार जानकारी दिएको छ । विभागले सूचना जारी गरी स्किल्ड ह्युमन रिसोर्स प्रालि र पुष्पा इन्टरप्राइजेज प्रालिले आफ्नो इजाजतपत्र रद्दका लागि विभागमा निवेदन दिएको जानकारी दिएको हो । ती कम्पनीले इजाजतपत्र रद्द गरी धरौटी रकम फिर्ता तथा बैंक ग्यारेन्टी फुकुवाका लागि विभागसमक्ष निवेदन दिएका थिए ।
विभागले ती कम्पनीहरुसँग कसैको हक स्वामित्व वा लेनदेनमा असर पर्ने भएमा ३५ दिनभित्र प्रमाणसहित विभागमा सम्पर्क गर्न अनुरोध गरेको छ । विभागले तोकेको उक्त समयभित्र कसैले दाबी विरोध नगरेमा ती कम्पनीको मागबमोजिम इजाजतपत्र रद्द, धरौटी रकम फिर्ता तथा बैंक ग्यारेण्टी फुकुवा हुनेसमेत प्रस्ट पारेको छ ।
केही समयअघि पनि विभिन्न म्यानपावर कम्पनीले इजाजतपत्र रद्दका लागि निवेदन दिएका थिए ।
कोरोना भाइरसको विश्वव्यापी महामारीलगायत कारणले वैदेशिक रोजगार व्यवसाय ठप्प बनेका कारण इजाजतपत्र रद्द गर्नुपर्ने अवस्थामा पुगेको एक व्यवसायीले बताए । कोरोना महामारीको समयमा वैदेशिक रोजगार व्यवसाय सञ्चालनमा आउन सकेको थिएन ।
जसको मारमा व्यवसायी परेका छन् । पछिल्लो समय कोरोना महामारी सामान्य बनेसँगै वैदेशिक रोजगारी व्यवसाय पहिलेकै अवस्थामा फर्कने प्रयासमा छ । केही महिनायताको तथ्यांक हेर्दा वैदेशिक रोजगारीमा जानेको संख्या बढ्दै गएको देखिन्छ । यसले यो क्षेत्रमा संलग्न व्यवसायीहरुलाई केही राहत पु¥याएको व्यवसायीहरु बताउँछन् ।
वैदेशिक रोजगार व्यवसाय सञ्चालनका लागि विभागबाट अनिवार्य स्वीकृति लिनुपर्ने व्यवस्था छ । स्वदेशमा रोजगारीको अवसर नहु“दा दैनिक हजारौंको संख्यामा नेपालीहरु विदेशिन बाध्य छन् । यसरी विदेशिने नेपालीहरुले पठाएको रेमिट्यान्सले मुलुकको अर्थतन्त्रमा ठूलो योगदान गरिरहेको छ ।
कोरोना महामारीलगायतका कारण नेपालमा भित्रिने रेमिट्यान्समा कमी आउँदा मुलुकको विदेशी मुद्रा सञ्चितिमा ठूलो दबाब परेको छ । यद्यपि, पछिल्लो समय रेमिट्यान्स बढ्दै गएको छ । कोरोना महामारी सामान्य बन्न थालेपछि विश्वको अर्थतन्त्र चलायमान बन्दा नेपालमा भित्रिने रेमिट्यान्समा पनि सुधार आउने अपेक्षा गरिएको छ ।
