काठमाडौं- नेपालीहरुको प्रमुख श्रम गन्तव्य मुलुकमध्येको एक कतारमा चालु आर्थिक वर्षको तेस्रो त्रैमास (माघदेखि चैत मसान्तसम्म)मा करिब १९ हजार श्रमिक लैजान मागपत्र प्रमाणीकरण भएका छन् । कतारस्थित नेपाली राजदूतावासले सार्वजनिक गरेको विवरणअनुसार समूहगततर्फ १८ हजार ८८० कामदारका लागि एक हजार १९२ वटा मागपत्र प्रमाणीकरण गरिएको हो ।
यसमा १६ हजार ९५६ पुरुष र एक हजार ९२४ महिला कामदार रहेका छन् ।तेस्रो त्रैमासमा प्रमाणीकरण भएका मागपत्र र कामदार संख्या दुवै दोस्रो त्रैमासको तुलनामा घटेका छन् । तेस्रो त्रैमासमा प्रमाणीकरण भएका मागपत्र संख्या ६८ र कामदार संख्या एक हजार १७३ जनाले घटेका हुन् । यस्तो संख्या दोस्रो त्रैमासबाटै क्रमशः घट्दै आएको देखिन्छ ।
दोस्रो त्रैमास अर्थात् कात्तिकदेखि पुस मसान्तसम्म २० हजार ५३ जनाका लागि एक हजार २६० वटा मागपत्र प्रमाणीकरण भएका थिए । यस्तै पहिलो त्रैमास (साउनदेखि असोज मसान्तसम्म) २८ हजार ५२६ जना कामदारका लागि एक हजार ४७९ वटा मागपत्र प्रमाणीकरण भएको तथ्यांक छ । यससागै चालु आवको नौ महिनामा कतारस्थित नेपाली राजदूतावासले कूल ६७ हजार ४५९ कामदारका लागि मागपत्र प्रमाणीकरण गरेको छ ।
तेस्रो त्रैमासमा व्यक्तिगत मागपत्र प्रमाणीकरण संख्या भने बढेको छ । माघदेखि चैत मसान्तसम्मको अवधिमा ८५९ जनाको व्यक्तिगत मागपत्र प्रमाणीकरण भएको कतारस्थित नेपाली राजदूतावासले जानकारी दिएको छ । पहिलो र दोस्रो त्रैमासमा क्रमशः ३७९ र ४५८ जनाको व्यक्तिगत मागपत्र प्रमाणीकरण भएका थिए । यसैगरी तेस्रो त्रैमासको अवधिमा ११६ जना घरेलु कामदारको पुनः श्रम स्वीकृतिको लागि सिफारिस गरिएको छ । यस्तो संख्या पहिलो र दोस्रो त्रैमासमा क्रमशः १३७ र ९९ रहेको थियो ।
तीन महिनामा ३५ शव नेपाल ल्याइयो
कतारबाट पछिल्लो तीन महिनाको अवधिमा ३५ जना नेपालीको शव नेपाल ल्याइएको छ । कतारस्थित नेपाली राजदूतावासले माघदेखि चैत मसान्तसम्मको अवधिमा उक्त संख्यामा शव नेपाल पठाएको विवरण सार्वजनिक गरेको हो ।
यसअघि पहिलो (साउन–असोज) र दोस्रो (कात्तिक–पुस) त्रैमासमा क्रमशः ४२ र ३७ जनाको शव नेपाल पठाइएको दूतावासले उल्लेख गरेको छ । यससँगै चालु आर्थिक वर्षको नौ महिना (चैत मसान्तसम्म) कतारबाट कूल ११४ जना नेपालीको शव नेपाल भित्रिएका छन् । दुर्घटनालगायत विभिन्न कारण मृत्यु भएका नेपालीहरुको शव दूतावासको पहलमा नेपाल ल्याइएको हो । उक्त अवधिमा परिवारको सहमतिमा कतारमै अन्त्येष्टि गरिएको संख्या भने शून्य रहेको दूतावासले जनाएको छ ।
साढे ३७ सय ई–पासपोर्ट वितरण
चालु आवको तेस्रो त्रैमासमा कतारस्थित नेपाली राजदूतावासबाट तीन हजार ७६७ वटा एमआरपी÷ई–पासपोर्ट वितरण गरिएको छ । राजदूतावासका अनुसार गत माघदेखि चैत मसान्तसम्म उक्त संख्यामा ई–पासपोर्ट वितरण गरिएको हो । साथै, सो अवधिमा चार हजार १९७ एमआरपी/ई–पासपोर्टका लागि लाइभ इनरोलमेण्ट गरिएको राजदूतावासले जानकारी दिएको छ । ई–पासपोर्टको वितरण तेस्रो त्रैमासबाट मात्र वितरण सुरु गरिएको हो ।
चालु आवको पहिलो त्रैमासमा तीन हजार ९५ वटा एमआरपी वितरण गरिएको थियो भने तीन हजार ३१२ एमआरपी लाइभ इनरोलमेण्ट गरिएको थियो । यसैगरी दोस्रो त्रैमासमा तीन हजार ३७५ वटा एमआरपी वितरण तथा तीन हजार ४२४ एमआरपी लाइभ इनरोलमेण्ट गरिएको कतारस्थित राजदूतावासले सार्वजनिक गरेको विवरणमा उल्लेख छ ।
