काठमाडौं- मलेसियाको भ्रमणमा रहेका नेपालका श्रम, रोजगार तथा सामाजिक सुरक्षामन्त्री कृष्णकुमार श्रेष्ठले त्यहाँ कार्यरत नेपाली सुरक्षा गार्डको पारिश्रमिक तीन हजार रिंगेट बनाउन प्रस्ताव गरेका छन् ।
मलेसिया भ्रमणको क्रममा मन्त्री श्रेष्ठले शनिबार त्यहाँका गृहमन्त्री हमजाह वीन जैनुदिनसँगको भेटका क्रममा यस्तो प्रस्ताव गरेका हुन् ।
श्रेष्ठले नेपाली सुरक्षागार्डको मासिक तलब तीन हजार मलेसियन रिंगेट हुनुपर्ने प्रस्ताव गरेको बताइएको छ । भेटका अवसरमा नेपाली श्रमिक मिहेनती र इमान्दार हुने चर्चा गर्दै मलेसियाका गृहमन्त्री जैनुदिनले गोर्खा गार्ड्सका रूपमा मलेसियामा नेपालीहरूको राम्रो प्रभाव रहेको बताएका थिए ।
पुत्रजयास्थित गृह मन्त्रालयमा भएको भेटवार्ताका क्रममा उनीहरूबीच नेपाल–मलेसिया सम्बन्धका साथै द्विपक्षीय हित र साझा चासोका विविध विषयमा कुराकानी भएको थियो । मन्त्री श्रेष्ठले मलेसियामा रहेका नेपाली सुरक्षागार्डसहित अन्य श्रमिकको समेत सेवा सुविधा र अधिकारको विषयमा गृहमन्त्री जैनुदिनस“ग छलफल गरेको बताइएको छ ।
नेपालमा सुरक्षागार्डसम्बन्धी तालिमको व्यवस्था गरी सीपयुक्त बनाउनेबारे समेत उनीहरूबीच छलफल भएको बताइएको छ । नेपालबाट सुरक्षागार्डमा रोजगारीका लागि विदेश जानेमा पूर्वसेना वा पूर्वप्रहरी हुने गरेका छन् । त्यसका साथै केही मात्रामा आधारभूत तालिम लिएका गैरसैनिक वा प्रहरी पनि जाने गरेका छन् ।
पूर्वगोर्खा ब्रिटिस सैनिकको प्रभावका कारण मलेसियामा गोर्खा गार्ड्सका रूपमा नेपालीप्रति उच्च सद्भाव रहेकोले समयानुकूल तालिम दिएर व्यावसायिक विकास गर्नेतर्फ ध्यान दिनुपर्ने भेटवार्तामा सहभागी मन्त्रालयका सचिव एकनारायण अर्यालले बताए । छलफलमा भएका विषयलाई औपचारिकता दिन छिट्टै द्विपक्षीय समझदारी हुने उनले बताए ।
यसअघि मन्त्री श्रेष्ठले मलेसियाका समकक्षी सेरी एम सराभननस“गको भेटका क्रममा श्रम सम्झौतालाई प्रभावकारी कार्यान्वयन गर्ने सहमति गरेका थिए । साथै, नेपाल र मलेसियाबीच संयुक्त कार्यदलको तेस्रो बैठक छिट्टै काठमाडौंमा गर्ने सहमति पनि भएको छ ।
यसका साथै नेपाली युवाहरूलाई सीपयुक्त बनाइ थप रोजगारीका अवसरहरू प्रदान गर्ने, शून्य लागतको सिद्धान्तलाई प्रभावकारी बनाउने, स्वास्थ्य, सामाजिक सुरक्षा, चौबीसै घण्टा प्रभावकारी हुने बिमा सुविधाको व्यवस्थाबारे पनि दुई पक्षबीच छलफल भएको थियो । मन्त्री श्रेष्ठको नेतृत्वमा भएको उच्चस्तरीय टोलीले मलेसियास्थित सामाजिक सुरक्षा संस्था (सोस्को) समेत भ्रमण गरेको थियो ।
प्रकाशित मिति: आइतबार, वैशाख १८, २०७९ १०:४५
-1745656903.jpeg)