काठमाडौं– चालु आर्थिक वर्षको चैत महिनामा नेपालबाट वैदेशिक रोजगारीमा जाने श्रमिकको संख्या सामान्य बढेको छ । वैदेशिक रोजगार विभागको तथ्यांकअनुसार चैतमा ५५ हजार ५२३ जना श्रमिक श्रम स्वीकृति लिएर विदेश गएका छन् । यो संख्या फागुन महिनाको तुलनामा दुई हजार ५६ ले बढी हो । फागुनमा ५३ हजार ४६७ जना नेपाली रोजगारीका लागि विदेश गएका थिए ।
चैत महिनामा रोजगारीका लागि नेपालबाट २७ हजार १५६ जनाले नयाँ श्रम स्वीकृति लिएर विदेश गएको देखिएको छ । २८ हजार ३६७ जनाले पुनः श्रम स्वीकृति लिएर विदेश गएको विभागको तथ्यांक छ । विभागले सार्वजनिक गरेको मासिक विवरणअनुसार चैत महिनामा सबैभन्दा धेरै श्रमिक साउदी अरबमा गएका छन् । साउदीमा १५ हजार २०१ जना श्रमिक गएका हुन् ।
उक्त महिना साउदीपछि धेरै नेपाली श्रमिक रोजगारीका लागि कतार गएको देखिएको छ । त्यो महिनामा नेपालबाट १४ हजार ८६९ जना नेपाली रोजगारीका लागि कतार गएका छन् । पछिल्लो समय मलेसियाको रोजगारी खुला नभएको समयमा नेपालबाट धेरै श्रमिक साउदी र कतार जाने गरेका छन् । त्यस्तै नेपालीहरूको अर्को श्रम गन्तव्य मुलुक युएई जाने नेपाली श्रमिकको संख्या ११ हजार ८६५ जना रहेको छ ।
त्यस्तै कुवेत जाने नेपालीको संख्या पाँच हजार ६२९ जना रहेको विभागले जारी गरेको विवरणमा उल्लेख छ । त्यस्तै रोजगारीका लागि मलेसिया गएका नेपालीको संख्या एक हजार ७९३ जना रहेको छ । लामो समयदेखि रोकिएको मलेसियाको रोजगारी केही समयअघि मात्रै मलेसिया खुलेको हो । फागुन महिनामा मलेसिया जाने नेपाली श्रमिकको संख्या ९९१ जना रहेको थियो । चैत महिनामा एक हजार ३०० श्रमिक बहराइन गएका छन् । त्यस्तै ओमानका लागि ६५० ले श्रम स्वीकृति लिएको विभागको तथ्यांकले देखाएको छ ।
यता पछिल्लो समय रोजगारी गन्तव्यका रूपमा विकास हुँदै गएको क्रोयसियामा श्रम स्वीकृति लिएर ६४३, रोमानिया ५३४ र साइप्रसमा ३६२ जना रोजगारीका लागि गएको देखिएको छ ।
१६ जिल्लाबाट एक हजारभन्दा बढी
चैत महिनामा एक हजारभन्दा बढी श्रमिक विदेश जाने जिल्लाको संख्या १६ रहेको छ । ७७ जिल्लामध्ये १६ वटा जिल्लाबाट एक महिनाको अवधिमा एक हजारभन्दा बढी श्रमिक विदेश गएका हुन् । त्यसैगरी पाँच जिल्लाबाट १५ जनाभन्दा कम श्रमिक विदेश गएको विभागको तथ्यांक छ । चैत महिनामा सबैभन्दा बढी श्रमिक विदेश जाने जिल्लामा धनुषा परेको छ । धनुषाबाट एक महिनामा तीन हजार ८४४ जना रोजगारीका लागि विदेश गएको देखिन्छ ।
त्यस्तै, सिराहा, झापा, महोत्तरी र मोरङ जिल्लाबाट पनि दुई हजारभन्दा बढी श्रमिक रोजगारीको सिलसिलामा विदेश गएका छन् । सिराहाबाट दुई हजार ९७३ जना विदेश गएका छन् भने झापाबाट दुई हजार ६५४ जना रोजगारीको खोजीमा विदेशिएका छन् । महोत्तरीबाट दुई हजार ६७४ र मोरङबाट दुई हजार १२७ जना रोजगारीका लागि विदेश गएको देखिएको छ ।
यस्तै, नवलपरासीबाट एक हजार ८४४ जना, सुनसरीबाट एक हजार ८०१ जना, रूपन्देहीबाट एक हजार ७५६ जना, सर्लाहीबाट एक हजार ५५७ जना विदेश गएका छन् । सप्तरीबाट एक हजार ४०९, स्याङ्जाबाट एक हजार ३४५, चितवनबाट एक हजार २९६ जना रोजगारीका लागि विदेश गएका छन् । यता तनहुँबाट एक हजार २२२, कपिलवस्तुबाट एक हजार १४९ र दाङबाट एक हजार ३६ जना श्रमिक रोजगारीका लागि विदेश गएका छन् ।
सबैभन्दा कम श्रमिक विदेश जाने जिल्लामा हुम्ला परेको छ । हुम्लाबाट चैत महिनाभरिमा जम्मा तीन जना रोजगारीका लागि विदेश गएको तथ्यांक छ । त्यस्तै डोल्पाबाट चार जना, मनाङबाट सात, मुस्ताङबाट आठ जना र मुगुबाट १४ जना श्रमिक विदेश गएको देखिन्छ ।
चैत महिनामा रोजगारीका लागि विदेश गएकामध्ये जम्मा १३ जना उच्च दक्षता हासिल गरेर गएको देखिएको छ । अदक्ष श्रमिक २० हजार ४९४ जना, अर्ध कुशल क्षमताका चार हजार ३३४ जना र व्यावसायिक क्षमता भएका ५८ जना नेपाली श्रमिक चैत महिनामा विदेश गएको तथ्यांक छ । कुनै न कुनै दक्षता हासिल गरेर विदेश जानेको संख्या ३० हजार ६२४ जना रहेको विभागले सार्वजनिक गरेको तथ्यांकमा उल्लेख छ ।
-1745656903.jpeg)