काठमाडौं– नेपाली कांग्रेसका महामन्त्री विश्वप्रकाश शर्माले वैदेशिक रोजगार क्षेत्रलाई मर्यादित र सम्मानजनक बनाउनुपर्नेमा जोड दिएका छन् । बुधबार कांग्रेसको शुभेच्छुक संस्था नेपाल लोकतान्त्रिक वैदेशिक रोजगार व्यवसायी एसोसियसनको ११औं साधारणसभा उद्घाटन गर्दै उनले यस्तो बताएका हुन् ।
महामन्त्री शर्माले यस क्षेत्रमा रहेका समस्या समाधानका लागि सबैले पहल गर्नुपर्ने बताए । व्यवसायमा देखिएका समस्या समाधानका लागि पार्टीका तर्फबाट आवश्यक सहयोग गर्न आफू सधैँ तयार रहेको उनको भनाइ थियो । अरू पार्टीले हातमा बन्दुक थमाएको समयमा नेपाली कांग्रेसले राहदानी थमाएका कारण विषम् परिस्थितिमा पनि नेपालको अर्थतन्त्र चलयमान हुन सकेको उनले दाबी गरे ।
‘नेपाली कांग्रेसले वैदेशिक रोजगारीको ढोका नखोलेको भए देश १० वर्षको युद्ध, भूकम्प, नाकाबन्दीलगायत समस्याको समयमा कसरी बाँच्थ्यो होला,’ महामन्त्री शर्माले भने । आलोचनाविहीन क्षेत्र कुनै पनि नहुने भन्दै उनले यो क्षेत्रको पनि आलोचना भएकोले व्यवसायी स्वयं सुधारमा लाग्नुपर्ने बताए । ‘सरकारले यो क्षेत्रलाई व्यवस्थित बनाउनका लागि प्रयास गर्नुपर्छ । त्यसका लागि कम्तीमा १० वर्षको योजना बनाएर अगाडि बढ्नुपर्ने आवश्यकता रहेको छ,’ शर्माले भने ।
कांग्रेसका सहमहामन्त्री भिष्मराज आङदम्बेले वैदेशिक रोजगार व्यवसायलाई मर्यादित बनाउनका लागि राज्यको भूमिका महŒवपूर्ण हुने बताए । कोभिडलगायतका कारणले व्यवसायी समस्यामा परेको अवस्थामा राज्यले राहतका कार्यक्रम ल्याउनुपर्ने उनले बताए । व्यवसायीलाई विभिन्न नियम ल्याएर दुःख दिने काम नगर्न पनि उनले सरकारसँग आग्रह गरे । ‘राज्यले सेवा शुल्कमात्रै समय सान्दर्भिक बनाउन सकेको खण्डमा यो क्षेत्र धेरै मर्यादित बन्न सक्छ,’ उनले भने । व्यवसायीले अहिले उठाएको धरौटी रकम फिर्ताको विषय जायज भएको भन्दै यसले समस्यामा परेका व्यवसायी जोगाउन सहयोग पुग्ने आङदेम्बेको भनाइ थियो ।
कांग्रेसका केन्द्रीय सदस्य अब्दुल सतारले वैदेशिक रोजगारीको क्षेत्रलाई मर्यादित र व्यवस्थित गर्न नसक्नुको कारण सरकारी कर्मचारी भएको बताए । कर्मचारीको बदमासीका कारण ऐन नियममा व्यवसायीलाई समस्या पार्ने किसिमका प्रावधानहरु राखिएको उनले बताए । एसोसियसनका पूर्वअध्यक्ष तिलकबहादुर रानाभाटले राज्यलाई असफल हुनबाट जोगाएको वैदेशिक रोजगारीको क्षेत्रलाई धराशायी हुनबाट जोगाउनुपर्ने बताए ।
व्यवसायीले खुलारुपमा व्यवसाय गर्न पाउनुपर्नेमा सरकार व्यवसायीको प्रतिस्पर्धी बनेको उनको आरोप छ । ‘सरकारले कोरिया तथा इजरायल जानका लागि लाखौँ रकम लिने गरेको छ । तर, व्यवसायीलाई भने १० हजार सेवा शुल्कमात्रै लिनुपर्ने प्रावधान राख्नु अव्यावहारिक छ, त्यसैले यो खारेज हुनुपर्छ ।’ वैदेशिक रोजगार व्यवसायी संघका संयोजक विमल प्रसाद ढकालले यो क्षेत्रमा देखिएका समस्या समाधान गरेर मर्यादित बनाउनका लागि सरकारसँग छलफल भइरहेको बताए । उनले आफू संघको चुनाव गर्नकै लागि आएकाले त्यही वातावरण निर्माणमा केन्द्रित रहेको बताए । स्थानीय तहको निर्वाचनपछि व्यवसायमा देखिएका समस्या समाधानदेखि संघको चुनाव हुने उनले बताए ।
प्रगतिशील वैदेशिक रोजगार व्यवसायी मञ्च नेपालका अध्यक्ष राजेन्द्र भण्डारीले राज्यले अव्यावहारिक नीतिका कारण यो क्षेत्रमा समस्या देखिएको बताए । सरकारमा रहने व्यक्तिले सस्तो लोकप्रियताका लागि निर्णय गदिदिँदा धेरै व्यवसायी पलायन हुने अवस्था सिर्जना भएको उनले बताए । लोकतान्त्रिक वैदेशिक रोजगार व्यवसायी एसोसियसनका वरिष्ठ उपाध्यक्ष तारनाथ अर्यालले यो व्यवसायमा सरकारले नै समस्या उत्पन्न गरेको भन्दै सरकारले नै समस्या समाधानका लागि पहल गर्नुपर्ने बताए । यो क्षेत्रका समस्या समाधानका लागि छाता संगठनका रुपमा रहको संघमा सबै मिलेर जानुपर्ने उनले बताए । मुलुकको कूल गार्हस्थ उत्पादनमा करिब २९ प्रतिशत योगदान रहेको क्षेत्रलाई समस्यामा पार्ने किसिमका मात्रै कानुनहरु निर्माण गरिएकाले समस्या भएको उनको भनाइ थियो ।
एसोसियसनको ११औँ साधारणसभाको उद्घाटन समारोहमा एसोसियसनका पूर्वअध्यक्ष, संस्थापक सदस्य, हालको कार्यसमितिका सदस्यहरुलाई सम्मान गरिएको छ । पूर्वअध्यक्षहरु तिलक रानाभाट, यमबहादुर केसी, किरणकिशोर घिमिरे, विमलप्रसाद ढकाल, प्रज्ञान न्यौपाने, पूर्वकार्यवाहक अध्यक्ष सुजितकुमार श्रेष्ठ तथा वर्तमान कार्यसमितिका पदाधिकारी र सदस्यहरूलाई सम्मान गरिएको हो ।
-1745656903.jpeg)