काठमाडौं– मलेसिया नेपालसहित विभिन्न मुलुकबाट घरेलु श्रमिक लैजान इच्छुक देखिएको छ । मलेसियाले घरेलु श्रमिकको अभाव पूर्ति गर्नका लागि नेपाललगायत देशबाट श्रमिक लैजाने विषयमा संवाद सुरु गरेको हो ।
मलेसियाले नेपालसँगै इण्डोनेसिया, भियतनाम, कम्बोडिया, श्रीलंका र बंगलादेशसँग घरेलु श्रमिक लैजानका लागि छलफल अगाडि बढाएको जनाइएको छ । मलेसियाका स्थानीय सञ्चारमाध्यमका अनुसार मलेसियामा हाल १० हजार घरेलु श्रमिकको माग रहेको छ । घरेलु श्रमिकको सुरुआती मासिक न्यूनतम तलब एक हजार २०० रिंगिट (नेपाली रूपैयाँ करिब ३४ हजार) हुने समाचारमा जनाइएको छ । रोजगारदाताले एक हजार ५०० रिंगिटसम्म दिनसक्ने बताइएको छ ।
सुरुमा इण्डोनेसियाबाट घरेलु श्रमिक लैजाने तयारी भएको समाचारमा जनाइएको छ । मलेसिया इण्डोनेसियाली श्रमिकको प्रमुख गन्तव्य मुलुक हो । भाषामा समानता र समान संस्कृति भएका कारण इण्डोनेसियाली श्रमिकको रोजाइमा मलेसिया पर्ने गरेको जनाइएको छ । यसैबीच मलेसियाले आगामी डेढ महिनाभित्रै करिब दुई लाख विदेशी श्रमिक भित्र्याउने प्रक्रिया पूरा गर्ने भएको छ । कोभिड–१९ पश्चात् लामो समयसम्म विदेशी श्रमिक लिन रोकेको मलेसियाले हाल श्रमिकको चर्को अभाव खेपिरहेको समाचारमा उल्लेख गरिएको छ ।
मलेसियाले निर्माण, कृषि, कारखाना, सेवा क्षेत्रमा तत्काल विदेशी श्रमिक लिने नीति लिएको छ । नयाँ श्रमिक लिने नीति लिएपश्चात् हालसम्म २४ हजार श्रमिकका लागि अनुमति दिने प्रक्रिया सकिएको र एक लाख ७९ हजार श्रमिक लिने प्रक्रिया छ हप्ताभित्रै सक्ने मलेसियाका मानव संशाधनमन्त्रीले जनाएको समाचारमा उल्लेख गरिएको छ । मलेसियामा अहिले छ लाखको हाराहारी विदेशी श्रमिकको माग रहेको जनाइएको छ ।
मलेसियाले विदेशी श्रमिकलाई मलेसियामा रोजगारदाताको शोषणबाट जोगाउन श्रम कानुनका विषयमा अभिमुखीकरण तालिम दिने योजनासमेत अगाडि सारेको समाचारमा उल्लेख गरिएको छ । उक्त तालिममा मलेसियामा आप्रवासी श्रमिकको अधिकारलगायतका विषयमा जानकारी दिइने र त्यसले ती श्रमिकलाई सम्भावित शोषणबाट जोगाउन मद्दत पुग्ने विश्वास लिइएको छ ।
