काठमाडौं– साउदी अरबस्थित नेपाली दूतावासले त्यहाँ रोजगारीमा रहेका नेपालीलाई नेपालमा रकम पठाउँदा वैधानिक माध्यमबाट पठाउन आग्रह गरेको छ । दूतावासले आधिकारिक मनि ट्रान्सफर कम्पनीमार्फत मात्रै रकम नेपाल पठाउन अनुरोध गरेको हो ।
बैंकिङ वा आधिकारिक रेमिट्यान्सको माध्यमबाट रकम पठाउँदा सुरक्षित, भरपर्दो र सहजै आफन्तले प्राप्त गर्ने भन्दै दूतावासले सोही माध्यम अपनाउन नेपालीहरूलाई आग्रह गरेको छ । दूतावासले एक विज्ञप्ति जारी गर्दै बैंक खातामा पैसा पठाउने बानीको विकास गर्नसमेत नेपाली श्रमिकलाई आग्रह गरेको छ । बैंक खाता नभएको खण्डमा खाता खोल्न र त्यसका लागि नेपाली बैंकका प्रतिनिधिहरू साउदीमा उपलब्ध हुने दूतावासले जारी गरेको विज्ञप्तिमा उल्लेख गरिएको छ ।
हुण्डी, हवाला तथा अन्य यस्तै माध्यमबाट पैसा पठाउनु अवैधानिक भएको र त्यसरी पैसा पठाउँदा पठाउने व्यक्तिसमेत जुनसुकै समयमा समस्यामा पर्न सक्नेतर्फ दूतावासले सजग गराएको छ । बैंकिङ माध्यमबाट पठाइएको रकम कुनै पनि सम्पत्ति खरिदका लागिसमेत देखाउन सकिने तर अन्य गैरकानुनी माध्यमबाट पठाइएको रकम आम्दानीको स्रोतका रूपमा प्रयोग गर्न नपाइने भएकाले त्यसो नगर्नका लागि दूतावासले नेपालीहरूलाई आग्रह गरेको छ ।
विदेशमा कमाएको कमाइलाई कानुनी बाटोबाट स्वदेश पठाउनेहरूलाई देश विकासको मूल प्रवाहमा ल्याउन सरकारले विभिन्न प्रोत्साहनमूलक कार्यक्रमहरू समेत ल्याएको भन्दै दूतावासले हुण्डी, हवाला जस्ता माध्यमहरूलाई निरुत्साहित गर्न आग्रह गरेको छ । नेपालबाट वैदेशिक रोजगारमा गएकाहरूले मनि ट्रान्सफर वा बैंकिङ माध्यमबाट स्वदेश पठाउने कानुनी व्यवस्था भए पनि विनाशुल्क तथा छिटो रकम प्राप्त गर्ने, कमिसन नलाग्नेजस्ता प्रलोभनमा परेर ठूलो मात्रामा रकम हुण्डीमार्फत पठाउने गरेको बताइएको छ ।
