काठमाडौं– कोरोनाको जोखिम बढेपछि कतार सरकारले स्वास्थ्य सुरक्षाको मापदण्डमा कडाइ गरेको छ । कतारको संकट व्यवस्थापन समितिको बुधबार बसेको बैठकले संक्रमण पूर्णरूपमा नियन्त्रणमा नआएको भन्दै शुक्रबारदेखि लागू हुने गरी स्वास्थ्य सुरक्षाका मापदण्डमा कडाइ गरेको हो ।
खाडी मुलुकहरूमा संक्रमण बढेसँगै स्वास्थ्य मापदण्ड पालनामा कडाइ गर्न थालिएको छ । सन् २०२० मा कोरोनाबाट आक्रान्त भएका ती मुलुकमा वर्षान्तसँगै कोरोना संक्रमण कम भएको थियो । गन्तव्य मुलुकले कोरोनाविरुद्धको खोप कार्यक्रम चलाइरहेका भए पनि संक्रमण फैलने दर अझै नियन्त्रणमा आएको छैन ।
पछिल्ला केही समययता मलेसिया, कतार, साउदी अरब, संयुक्त अरब इमिरेट्स (युएई), ओमन, बहराइन र दक्षिण कोरियामा फेरि कोरोना भाइरस संक्रमण बढ्न थालेको हो । कतार सरकारले कोरोना सम्बन्धि पालना गर्नुपर्ने ३३ बुँदे निर्देशनहरू जारी गरेको छ । योसँगै २६ मार्चदेखि कतारमा निजी तथा सरकारी क्षेत्रमा हुने बैठकहरूमा पनि ५ जनाभन्दा बढी उपस्थित हुन नपाइने भएको छ । घर तथा कार्यालयमा बस्दासमेत ५ जनाभन्दा बढी मानिस सँगै भेला नहुन कतार सरकारले निर्देशन दिएको हो ।
यस्तै कतार सरकारले व्यापारिक भवनहरूमा हुने क्रियाकलापलाई पनि ३० प्रतिशतमा सिमित गरेको कतारमा रहेको नेपाली दूताबासले जनाएको छ । नयाँ नियमअनुसार कतारमा रहेका सबै सार्वजनिक पार्क, सार्वजनिक समुद्री किनार, कर्निसलगायत अन्य सार्वजनिक स्थलहरू पनि बन्द हुनेछन् । यस्तै प्रकारका अन्य सार्वजनिक स्थलमा एकै परिवारका २ जनाभन्दा बढी जान नपाइने बताइएको छ ।
यसैगरी, सवारीसाधनमा पनि चालकसहित चार जनाभन्दा बढी यात्रुले यात्रा गर्न नपाइने निर्देशनमा उल्लेख छ । १ जनाभन्दा बढी यात्रु भएमा सबैले अनिवार्य मास्क लगाउनुपर्ने छ । कुनै कामका लागि पनि घरबाट बाहिर निस्किँदा अहिले चलाइरहेको ऐतराज एप्लिकेसन अनिवार्य मोबाइलमा हुनुपर्ने पनि निर्देशनमा भनिएको छ । निर्देशनको पालना नगरेमा कडा कारबाही हुने भन्दै त्यहाँ रहेका नेपालीहरूलाई निर्देशनको पालना गर्न त्यहाँस्थित नेपाली दूताबासले आग्रह गरेको छ ।
