- वैदेशिक रोजगारीका क्रममा मृत्यु/अशक्त भएका श्रमिकका तीन हजार ३६३ छोराछोरीलाई छात्रवृत्ति प्रदान
- छात्रवृत्ति पाउने कूल विद्यार्थीमध्ये एक हजार ७८१ जना छात्र र एक हजार ५८२ जना छात्रा
- लुम्बिनी प्रदेशबाट सबैभन्दा ७७८ जनाले पाए छात्रवृत्ति
काठमाडौं- चालु आर्थिक वर्षमा वैदेशिक रोजगारीका क्रममा मृत्यु/अशक्त भएका श्रमिकका तीन हजार ३६३ छोराछोरीले छात्रवृत्ति पाएका छन् । वैदेशिक रोजगार बोर्डअन्तर्गतको वैदेशिक रोजगार कल्याणकारी कोषमार्फत उक्त छात्रवृत्ति प्रदान गरिएको युवा, श्रम तथा रोजगारमन्त्री रामजी यादवले सामाजिक सञ्जाल फेसबुकमार्फत जानकारी दिएका छन् ।
छात्रवृत्ति पाउने कूल विद्यार्थीमध्ये एक हजार ७८१ जना छात्र र एक हजार ५८२ जना छात्रा रहेका जानकारी दिइएको छ । ‘प्रदेशगत आधारमा हेर्दा सबैभन्दा बढी विद्यार्थीहरू लुम्बिनी प्रदेशबाट रहेका छन्, जहाँ ७७८ जनाले छात्रवृत्ति प्राप्त गरेका छन् । कोशी प्रदेशबाट ७३७ जना, मधेस प्रदेशबाट ७१३ जना र गण्डकी प्रदेशबाट ५३१ जना विद्यार्थीहरू समेटिएका छन्,’ मन्त्री यादवले सार्वजनिक गरेको विवरणमा उल्लेख छ ।
छात्रवृत्ति पाउने बागमती प्रदेशका ३८१ जना छन् । कर्णाली र सुदूरपश्चिम प्रदेशको संख्या तुलनात्मकरूपमा कम देखिएको छ । विवरणअनुसार कर्णाली प्रदेशबाट १३८ जना र सुदूरपश्चिम प्रदेशबाट ८५ जना विद्यार्थी छात्रवृत्तिका लागि छनोट भएका छन् । ‘वैदेशिक रोजगार बोर्डमा प्राप्त हुन आएका छात्रवृत्तिका निवेदनहरू उपर बोर्डले आवश्यक कागजातहरूको मापदण्डका आधारमा छनोट गरेबमोजिम छात्रवृत्ति वितरण गरिएको छ,’ मन्त्री यादवले भनेका छन् ।
मृत्यु/अशक्त भएका श्रमिकका छोराछोरीलाई शिक्षामा राहत पुर्याउने उद्देश्यले वैदेशिक रोजगार ऐन, २०६४ बमोजिम बोर्डले छात्रवृत्ति कार्यक्रम सञ्चालन गर्दै आएको जनाएको छ । बोर्डका अनुसार निवेदन आउने क्रम जारी रहेकोले छात्रवृत्ति प्राप्त गर्ने संख्या बढ्ने छ ।
