काठमाडौं - युनाइटेड अरब इमिरेट्स (यूएई)का वैदेशिक व्यापारमन्त्री डा. थानी बिन अहमद अल जेयुदीको नेतृत्वमा आएको प्रतिनिधिमण्डलले परराष्ट्रमन्त्री शिशिर खनालसँग शिष्टाचार भेटवार्ता गरेको छ । बिहीबार बिहान सिंहदरबारस्थित परराष्ट्र मन्त्रालयमा भेटवार्ता भएको हो ।
“भेटघाटका क्रममा दुई मन्त्रीहरूले व्यापार, लगानी, एआई, डिजिटल रूपान्तरण, पर्यटन, श्रम आप्रवासन, पूर्वाधार, नवीकरणीय ऊर्जाका साथै प्राथमिकताका क्षेत्रहरूमा सार्वभौम सम्पत्ति कोषको लगानी वृद्धिसहित पारस्परिक हितका विभिन्न क्षेत्रहरूमा नेपाल र यूएईबीचको द्विपक्षीय सम्बन्धलाई सुदृढ पार्ने बारेमा विचार आदानप्रदान गर्नुभयो,” परराष्ट्र मन्त्रालयले जारी गरेको विज्ञप्तिमा भनिएको छ ।
भेटमा परराष्ट्रमन्त्री खनालले नेपालमा विभिन्न परियोजनामा यूएईको लगानी सुनिश्चित गरेर कूटनीतिक सम्बन्धको आसन्न स्वर्णजयन्ती समारोहलाई एउटा प्रमुख कोसेढुंगा बनाउने नेपाल सरकारको चाहना व्यक्त गरेका थिए । परराष्ट्रमन्त्री खनालले कन्सुलर सेवा विभागद्वारा प्रमाणीकरण गरिसकेपछि पनि प्रहरी प्रतिवेदनको थप प्रमाणीकरण गर्नुपर्ने आवश्यकतालाई हटाउन यूएई सरकारलाई आग्रह गरेका थिए ।
