काठमाडौं- नेपाली कांग्रेसको शुभेच्छुक संस्था नेपाल लोकतान्त्रिक वैदेशिक रोजगार व्यवसायी एसोसिएसन आन्तरिक विवादमा फसेको छ । १३औं साधारणसभा निर्वाचित अध्यक्ष रामप्रसाद गैरे निलम्बनमा परेपछि नेतृत्व विवाद चुलिएको हो ।
असार ५ गते सम्पन्न साधारणसभाबाट निर्वाचित गैरे उनको म्यानपावरसँग सम्बन्धित पुरानो मुद्दाका कारण निलम्बनमा परेका थिए । त्यसपछि चुनावमा अध्यक्षका प्रत्यासी रहेका किशोरकुमार केसी आफूलाई अध्यक्षको जिम्मेवारी दिन माग गर्दै जिल्ला प्रशासन कार्यालय काठमाडौं पुगे ।
प्रशासनले उनको मागबमोजिम अध्यक्षको जिम्मेवारी तोक्ने निर्णयसहितको पत्र असार २२ गते एसोसिएसनलाई पठायो । उक्त पत्रमा १३औं साधारणसभाबाट अध्यक्ष पदमा निर्वाचित गैरेको योग्यता संस्थाको विधानको दफा ७ र ८ बमोजिम नपुगेको देखिएको उल्लेख छ । प्रशासनको २२ असारको निर्णयअनुसार गैरेलाई अध्यक्ष पदबाट हटाएर निर्वाचनमा सो पदका निकटतम् रहेका केसीलाई अध्यक्षको जिम्मेवारीमा काम गर्न दिन एसोसिएसनलाई निर्देश गरिएको छ ।
'निर्वाचनमा हारेको व्यक्तिलाई जिल्ला प्रशासनले कुन आधारमा अध्यक्षको जिम्मेवारी तोक्यो ? कानुन र संस्थाको विधानबमोजिम जाने हो भने कि त उपाध्यक्षलाई कार्यवाहक अध्यक्ष दिनुपर्यो, कि त अध्यक्षको मात्रै निर्वाचन गर्नुपर्यो । विधि, विधान र कानुनविपरीतको निर्देशन मान्न हामी तयार छैनौं ।'
-सुवर्ण लामा
कार्यसमितिले तोकेको कार्यवाहक अध्यक्ष
तर, सोही साधारणसभाबाट निर्वाचित कार्यसमितिका बाँकी पदाधिकारी तथा सदस्यहरु प्रशासनको निर्णय स्वीकार गर्न तयार भएनन् । विधानविपरीत प्रशासनले निर्वाचनमा पराजित व्यक्तिलाई अध्यक्षको जिम्मेवारी तोकेको भन्दै उक्त निर्णय नमान्ने अडान उनीहरुले लिए ।
प्रथम उपाध्यक्ष सुवर्ण लामालाई कार्यवाहक अध्यक्षको जिम्मेवारी दिने निर्णय गरेर अगाडि बढे ।यता केसी प्रशासनको निर्णयअनुसार आफू नै आधिकारिक अध्यक्ष भएको दाबी गर्दै बुधबार एसोसिएसनको कार्यालय पुगे । पदभार ग्रहण गर्न केसी पुगेपछि दुईपक्षबीच कार्यालयमै लफडा भएको थियो ।
'नेपाल सरकारको आधिकारिक निकाय जिल्ला प्रशासन कार्यालयको निर्णय नमान्ने भन्ने हुन्छ ? आधिकारिक अध्यक्ष म नै हुँ, मैले कार्यालयमा गएर पदभार ग्रहण गरिसकेँ । '
-किशोरकुमार केसी
जिप्रकाले तोकेको अध्यक्ष
दाबी आ-आफ्नै
कार्यवाहक अध्यक्षको जिम्मेवारी सम्हालेका सुवर्ण लामाले विधानविपरीत अध्यक्ष तोकिएका किशोरकुमार केसीलाई कुनै पनि हालतमा अध्यक्ष स्वीकार नगर्ने बताए । कार्यसमितिका १८ जना नै यसमा एकमत रहेको उनले बताए ।
‘निर्वाचनमा पराजित भएको व्यक्तिलाई जिल्ला प्रशासनले कुन आधारमा अध्यक्षको जिम्मेवारी तोक्यो ? कानुन र संस्थाको विधानबमोजिम जाने हो भने कि त उपाध्यक्षलाई कार्यवाहक अध्यक्ष दिनुपर्यो कि त अध्यक्षको मात्रै निर्वाचन गर्नुपर्यो,’ लामाले प्रभावसँग भने, ‘विधि, विधान र कानुनविपरीतको निर्देशन मान्न हामी तयार छैनौं ।’
लामाको अध्यक्षतामा बुधबार बसेको बैठकले पनि केसीलाई अध्यक्ष स्वीकार नगर्ने निर्णय गरेको छ । बैठकले प्रशासनको निर्णय अवैधानिक र त्रुटिपूर्ण रहेको ठहर गरेको कार्यवाहक अध्यक्ष लामाले जानकारी दिए ।
केसीले भने आधिकारिक अध्यक्ष आफू नै भएको जिकिर गरे । ‘नेपाल सरकारको आधिकारिक निकाय जिल्ला प्रशासन कार्यालयको निर्णय नमान्ने भन्ने हुन्छ ?,’ उनले प्रतिप्रश्न गर्दै प्रभावसँग भने, ‘आधिकारिक अध्यक्ष म नै हुँ, मैले बुधबार कार्यालयमा गएर पदभार ग्रहण गरिसकेँ ।’
प्रशासनको निर्णय/निर्देशन सबैले मान्नुपर्ने बताउँदै उनले तत्काल आफूलाई अध्यक्ष स्वीकार नगरे पनि विस्तारै सबैले स्वीकार गर्ने दाबी गरे । लामालाई कार्यवाहक अध्यक्ष दिने निर्णय आधिकारिक नहुने पनि उनको भनाइ छ । ‘कार्यवाहक अध्यक्षको जिम्मेवारी अध्यक्षले दिने हो । अध्यक्षले पत्र दिएको छैन, आफूले आफैंलाई कार्यवाहक दिने निर्णय वैधानिक हुँदैन,’ केसीले भने ।
निर्वाचनमा उनी निलम्बित अध्यक्ष गैरेसँग झण्डै दोब्बर मतान्तरले पराजित भएका थिए । गैरेले १८६ मत प्राप्त गर्दा केसीले ९५ मतमात्र पाएका थिए ।
