दोहा– गैरआवासीय नेपाली संघ राष्ट्रिय समन्वय परिषद कतारद्वारा १४ नेपालीलाई निःशुल्क हवाई टिकट उपलब्ध गराई स्वदेश पठाएको छ ।
कोरोना भाइरस कोभिड–१९ को कारणले कतारमा रोजगारी गुमाएर नेपाल फर्कन प्राथमिकतामा परेका तर हवाइ भाडा जुटाउन नसकेका १४ नेपालीलाई फिर्तीका लागि हवाइ टिकट सहयोग गरेको एनआरएनए कतारका अध्यक्ष मोहमद मुक्तदा मुसलमान जानकारी दिए ।
उनका अनुसार कतारस्थित नेपाली दूताबासको संरक्षकत्व र सहयोगमा गैरआवासीय नेपाली संघ राष्ट्रिय समन्वय परिषद् कतार र नेपाली व्यावसायी संघ कतारद्वारा पहिलो चरणमा ५५ जनाका लागि हवाइ टिकट उपलब्ध गराउने निर्णयअनुसार दुई चरणमा गरी १४ जनालाई हवाइ टिकट दिएको हो ।
पहिलो चरण १८ जुलाईमा दुवै मिर्गौला गुमाई लामो समयदेखि अस्पतालमा उपचाररत कपिलवस्तुका अब्दुल मुगिस मु र दार्चुलाका कमानसिंङ महरलाई निःशुल्क हवाइ टिकट उपलब्ध गराई नेपाल पठाएको उनले बताए ।
यस्तै, १९ जुलाईमा लामो समयदेखि एनसिसीको सेल्टरमा रहेका संखुवासभाका सालबाहदुर कार्की र सप्तरीका रामप्रित ठाकुरलाई हवाइ टिकट उपलब्ध गराई नेपाल पठाइएको जनाएको छ ।
दोस्रो चरणअन्तर्गत १४ अगस्टमा सर्लाहीका रामदुलार चौधरी, उदयपुरकी ज्ञानुका पोखरेल, इलामकी कृष्णा राई, कपिलवस्तुका मोहम्मद खुरसिद, मोरङका ईश्वरकुमार श्रेष्ठलाई निःशुल्क हवाइ टिकट उपलब्ध गराई स्वदेश पठाएको संघले जनाएको छ ।
यसैगरी, अर्घखाँचीका अनिष मियाँ, झापाका रामचन्द्र राजबशसी, कपिलवस्तुका गुरूप्रसाद चौधरी, धनुषाका अजिज अन्सारी तथा सिरहाका चन्द्रबहादुर मगरलाई निःशुल्क हवाइ टिकट उपलब्ध गराई नेपाल पठाइएको अध्यक्ष मुसलमानले बताए ।
