काठमाडौं– श्रम, रोजगार तथा सामाजिक सुरक्षा मन्त्रालयका प्रवक्ता सुमन घिमिरेले मलेसियामा एक नेपाली सुरक्षा गार्डमाथि अमानवीय ढंगले कुटपिट गर्ने व्यक्ति र कम्पनीको छानबिन सुरु भएको बताएका छन् । आइतबार प्रभाव दैनिकसँगको कुराकानीमा मलेसियास्थित नेपाली दूताबासले छिट्टै छानबिन सकेर श्रमिकमाथि कुटपिट गर्ने व्यक्ति र कम्पनीमाथि कडाभन्दा कडा कारबाही गरिने उनले बताए ।
‘कसैमाथि त्यसरी अमानवीय ढंगले कुटपिट गर्न पाइँदैन । त्यसरी कुटपिट गर्ने व्यक्ति र कम्पनीलाई कडाभन्दा कडा सजाय हुनेछ,’ उनले भने, ‘दूताबासले अहिले त्यसरी नीच तरिकाले कुटपिट गर्ने व्यक्ति र कम्पनीको सूक्ष्म छानबिन गरिरहेको छ ।’
यसै सन्दर्भमा नेपाल वैदेशिक रोजगार संघका महासचिव सुजितकुमार श्रेष्ठले पशुभन्दा पनि तल्लो स्तरमा उत्रिएर अमानवीय ढंगले नेपाली श्रमिकमाथि हातपात गर्ने व्यक्तिलाई कडाभन्दा कडा कारबाही गर्न दूताबासलाई सिफारिस गरिएको बताएका छन् । आइतबार प्रभाव दैनिकसँगको कुराकानीमा हातपात गर्ने व्यक्ति र कम्पनीलाई कडाभन्दा कडा कारबाही भएन भने उक्त कम्पनीलाई सदाका कालोसूचीमा राखिने उनले बताए ।
उनले भने, ‘श्रमिकमाथि अमानवीय ढंगले कुटपिट गर्नेमाथि कडाभन्दा कडा कारबाही हुनुपर्छ । कसैमाथि त्यसरी हिंसात्मक ढंगले उत्रिन मिल्दैन । यदि व्यक्ति र कम्पनीलाई कारबाही भएन भने सदाका लागि उक्त कम्पनी नेपालमा कालोसूचीमा राखिनेछ ।’
महासचिव श्रेष्ठका अनुसार अमानवीय ढंगले कुट्ने व्यक्ति भारतीय मूलका नागरिक र उनी एलाइन्स सेक्युरिटीका सुपरभाइजर हुन् । पीडित नेपाली श्रमिक नवलपरासीका रहेको उनले बताए । यद्यपि, जसरी भए पनि पीडितले न्याय पाएरै छाड्ने पनि उनले बताए ।
राजदूत डा. उदयराज पाण्डेले एक मिनेटभन्दा लामो उक्त अमानवीय भिडियो हेरेपछि सोमबार ११ बजेसम्म कारबाही गरिसक्ने आफूलाई बताएको उनले बताएका छन् । उनले राजदूतको भनाइ उद्धृत गर्दै भने, ‘मैले एक मिनेट लामो भिडियो हेरेँ । श्रमिकमाथि कोही यसरी हिंसात्मक ढंगले उत्रिन सुहाउ“दैन । श्रमिक भएन भने कम्पनीको साख कसरी जोगिन्छ । तर, भिडियोमा श्रमिकमाथि उल्टै हातपात गरिएको छ । हामीले कारबाहीको दायरा अघि बढाएका छौँ । सोमबार ११ बजेभित्र कारबाही भएको खबर सुन्न पाउने छ ।’
महासचिव श्रेष्ठले गार्डले कुटाइ किन खाए भन्ने सन्दर्भ प्रमुख नभई मानव अधिकारभन्दा बाहिर रहेर कसैले आफूखुसी गर्न नपाइने बताएका छन् । उनले भने, ‘मलेसिया र नेपाल सरकारबीच मानवअधिकारसम्बन्धि सम्झौता भएको छ । उक्त सम्झौतामा श्रमिकमाथि कुनै पनि त्यहाँको कम्पनीले अमानवीय व्यवहार गर्न नपाइने उल्लेख छ । तर, यहाँ त श्रमिकमाथि हेर्नै नसकिने गरी अमानवीय व्यवहार गरिएको छ ।’
यसै सन्दर्भमा वैदेशिक रोजगार एकता समाजका अध्यक्ष हरिबहादुर पाण्डेले परिवारका लागि विदेशमा ज्यान धरापमा राख्ने श्रमिकमाथि त्यसरी कुट्नु पशुभन्दा पनि नीच व्यवहार भएको बताएका छन् । त्यसरी कुटपिट गर्ने व्यक्ति र त्यस कम्पनीलाई सदाका लागि नेपालबाट हटाउनुपर्ने उनले बताए ।
‘भिडियो हेर्दै जो कोहीको दिमाग रन्थनिन्छ । आफ्नो ज्यान धरापमा राखेर परिवारका खुसीका लागि विदेशमा पसिना बगाउनेमाथि त्यसरी कुटपिट गर्नेलाई सरकारले कारबाहीको दायरामा ल्याउनुपर्छ,’ भन्दै उनले भने आफूले यस घटनाका विषयमा दूताबासले छानबिन गरिरहेको र संघमार्फत कारबाही भई छाड्।ने जानकारी प्राप्त भएको बताए ।
नेपाली श्रमिकलाई दुःख दिनेहरूलाई कालोसूचीमा राखेर नै यस्तो गतिविधि रोक्नुपर्ने प्रभावसँगको कुराकानीमा प्रगतिशिल वैदेशिक रोजगार मञ्च नेपालका संयोजक रामप्रसाद भान्तनाले बताएका छन् । उनले भने, ‘यदि त्यस्ता कम्पनीलहरू बन्द भएनन् भने फेरि भोलि यस्तै समस्या दोहोरिनेछ । त्यसैले यो घटनामा दूताबासले कारबाहीका लागि विलम्ब गर्न हुँदैन । जसरी हुन्छ कारबाहीको दायरामा ल्याउनुपर्छ ।’
उता, मलेसियन ट्रेड युनियन कांग्रेसले नेपाली सुरक्षा गार्डलाई कुटपिट गर्ने व्यक्तिलाई तत्काल कारबाही हुनुपर्ने माग गरेको छ । एक मिनेट लामो भिडियोमा एक व्यक्तिले एक नेपाली सुरक्षा गार्डलाई लगातार कुटपिट गरेको देखिएको छ । हाल भाइरल भइरहेको भिडियोमा कुटपिट गर्ने व्यक्तिले स्थानीय मले भाषामा बोलेको सुनिन्छ ।
