दोहा– कोरोनाका कारण रोजगार गुमाएका वा अलपत्र परेका नेपालीहरूलाई चार्टर्ड विमानमार्फत स्वदेश फिर्ती गराइरहेको बेला कुवेतदेखि काठमाडौंसम्मको चर्को भाडादर हवाइ टिकट किनबेचमा अनियमितता भएको तथा बढी भाडा लिएको गुनासो आउन थालेपछि कारबाही गर्ने चेतावनी दिएको छ ।
कुवेतस्थित नेपाली दूताबासका अनुसार हाल केही ट्राभल एजेन्सी कम्पनीहरूले उडान कम्पनी, उडान मिति र समयबारे कुनै सुनिश्चित जानकारी नै नगराई मनोमानी रूपमा तोकेकोभन्दा बढी मूल्यमा हवाइ टिकट बेचिरहेको गुनासो आउन थालेको जनाएको छ ।
नेपाल सरकारले कुवेत–काठमाडौं सेक्टरको चार्टर्ड उडानबाट यात्रा गर्ने यात्रुहरूका लागि प्रतिव्यक्ति हवाइ भाडादर अमेरिकी डलर ४१० (सम्पूर्ण करहरूसहित) तोकेको व्यहोरा सम्बन्धित सबैको जानकारीका लागि पुनः अनुरोध गरिएको दूताबासले जनाएको छ ।
तोकिएकोभन्दा बढी हवाइ भाडा असुल नगर्न नगराउन सम्बन्धित सबैलाई सूचित गरिएको जानकारी गराउँदै कुवेतमा रहेका नेपालीहरूले पनि हवाई टिकट खरिद गर्नुभन्दा अघि सम्बन्धित एयरलाइन्सहरूका आधिकारिक बिक्रेताबाट नेपाल सरकारबाट निर्धारित भाडा दरमा मात्रै टिकट खरिद गर्न दूताबासले अनुरोध गरेको छ ।
यदि कसैले अनाधिकृत तवरबाट तोकिएभन्दा बढी रकममा हवाइ टिकट किनबेच गरेको पाइएमा प्रचलित कानुन बमोजिम कारबाही गरिने दूताबासले जनाएको छ ।
-1745656903.jpeg)