दोहा– एनआरएनए कतारले कोरोना भाइरसका कारणले कतारमा रोजगारी गुमाएर अलपत्र परी नेपाल फर्कन हवाइ भाडा जुटाउन नसकेका ४ जना नेपालीलाई हवाइ टिकट सहयोग गरेको छ ।
हवाइ टिकट खरिद गर्न नसक्ने पीडित नेपाली श्रमिकहरुका लागि कतारस्थित नेपाली दूताबासको संरक्षकत्व र सहयोगमा गैरआवासीय नेपाली संघ राष्ट्रिय समन्वय परिषद् कतार र नेपाली ब्यावसायी संघ कतारद्वारा पहिलो चरणमा ५५ जनाका लागि हवाइ टिकट उपलब्ध गराउने निर्णयअनुसार ४ जनालाई टिकट सहयोग गरिएको एनआरएनए कतारका प्रवक्ता सन्तोष क्षत्री जानकारी दिएका छन् ।
उनका अनुसार दुवै मिर्गौला फेल भई लामो समयदेखि कतारको हस्पिटलमा उपचाररत कपिलवस्तुका अब्दुल मुगिस मु, दार्चुलाका कमानसिंङ महर, लामो समयदेखि एनसिसीको सेल्टरमा रहेका संखुवासभाका सालबाहदुर कार्की र सप्तरीका रामप्रित ठाकुरलाई हवाइ टिकट उपलब्ध गराई नेपाल पठाइएको प्रवक्ता क्षत्री बताए ।
कोरोना भाइरसको महामारीबाट रोजगारी गुमाएर पैसाकै कारण स्वदेश फर्किन नसकेका तथा गम्भीर स्वास्थ्य समस्या भएकाहरुलाई पहिलो चरणमा स्वदेश फर्काउनका लागि हवाइ टिकट उपलब्ध गराइने उनले बताए ।
