अरबका टिकट काट्न नसक्नेको कथा
दोहा– सरकारले विदेशमा समस्यामा परेका नेपाली नागरिकलाई उद्दारको नाममा चर्को शुल्क लिएरै भए पनि स्वदेश फर्काउन हालसम्म करिव २६ हजार नेपालीलाई विभिन्न मुलुकबाट उद्दार गरिसकेको छ । तर, खाडी मुलुकहरूमा पैसा नभएर स्वदेश फर्कन नसकेका नेपालीहरूको कथा भने फरक छ । केहि वर्षदेखि साउदी अरबमा काम गर्दै आएका नवलपरासीका सीताराम पाण्डे कोरोनाको कारण कम्पनी बन्द भएपछि लामो समय देखि कामविहीन भएर कोठामा बस्न बाध्य छन् ।
पाण्डेका अनुसार स्वदेश फर्कनै पर्ने भएकाले अनलाइन फारम भर्नुपर्ने भनेर साउदीस्थित नेपाली दूताबासले उपलब्ध गराएको फारम पनि भरे नामवालीमा नाम पनि आयो गत जुन १९ मा साउदीको दमामबाट उडान थियो तर के गर्नु आफूस“ग टिकेट काट्ने पैसा पुगेन ।
उनले भने, ‘मसँग १ हजार साउदी रियाल मात्र थियो टिकटका लागि मलाई १ हजार ७ सय ४४ रियाल चाहिने थियो । जतोतसो कम्पनीले खाना दिए पनि टिकट काट्ने पैसा नभएको कारण अहिले हरेक दिन उड्दै गरेको विमानलाई हेरेर दिन कटाइरहेको छु ।’ दूताबासमा आफूसँग टिकेट काट्ने पैसा नपुगेको जानकारी गराए पनि टिकट सस्तो भएपछि घर जानू भन्दै दूताबासले फोन राखेको उनले बताए ।
यता, कतारमा पनि खान बस्नसमेत नभएर अलपत्र अवस्थामा पुगेका नेपाली श्रमिक भने अझसम्म स्वदेश फर्कन सकेका छैनन् । कोरोनाको कारण कम्पनी बन्द भएर विगत चार महिनादेखि अन्य साथीहरूकामा आश्रय लिएर दिन कटाइरहेका सिरहाका रामबाबु महतोको समस्या पनि उस्तै छ ।
टिकट काटेकाहरूको समस्या पनि उस्तै
खाडीमा कोरोना सुरु हुनुभन्दा अघिनै टिकट काटेर स्वदेश फर्किने तयारीमा रहेको तर कोरोनाको उडान बन्द भएपछि फर्किन नपाएकाहरूको पीडा पनि उस्तै छ । मोरङका दुर्गाप्रसाद कोइरालाले पहिले नै घर फर्किन टिकट काटे तर पछि कोरोना सुरु भएपछि उडान बन्द भयो । तीन महिनादेखि कामविहीन भएर कोठामै बस्न बाध्य भएकाले अहिले खानाको समस्या हुन थालेको उनले बताए ।
उनका अनुसार एकपटक कतारस्थित नेपाली दूताबासमा पुगेर आफ्नो समस्या सुनाएको र दूताबासले हुन्छ, पछि हामी आफैँले सम्पर्क गर्नेछौँ भनेको थियो अहिलेसम्म सम्पर्क गरेको छैन । आफूजस्तै टिकट काटेर बसेका धेरै नेपालीहरू समस्यामा छन् । सरकारले तेस्रोपटक एक साताका लागि उडान तालिका थप गरेको छ । सरकारले थप गरेको उडान तालिका अनुसार खाडीका ६ वटा मुलुकबाट ४२ वटा उडान हुँदै छ ।
-1745656903.jpeg)