योगेन्द्र योगी
दोहा– हिमालयन एयरलाइन्सले कुवेतबाट समस्यामा परेका नेपालीहरूलाई उद्दारको नाममा गतिलो लुट मच्चाउने प्रयास भइरहेको भन्दै सबै नेपालीलाई सचेत हुन एनआरएनए कुवेतका महासचिब दिलकुमार पाख्रिनले सामाजिक सञ्जालमार्फत आग्रह गरेका छन् ।
उनका अनुसार नेपाल सरकारले ४१० डलर अर्थात १२६ केडी भाडदर तोके पनि हिमालयन एयरलाइन्सको टिकट बेच्ने एजेन्सी अल वसित टुर एन्ड ट्राभलले खुलेआम १९० केडीको ब्यानर छापेको छ । तर नेपालीस्थित नेपाली दूताबासले १३० केडीभन्दा कम पर्ने कुरालाई जिकिर गर्दै भ्रममा नपर्न सबै कुवेतबासी नेपालीहरूलाई सूचना गरी गरेको छ ।
उनले लेखेका छन्– हिमालयन एयरलान्सको टिकट नलिन कुवेतबासी सबै नेपालीहरूलाई अनुरोध गर्दछु । साथै खुलेआम समस्यामा परेका नेपालीहरूलाई लुट्ने हिमालयन एयरलाइन्सलाई कारबाहीको दायरामा ल्याउन नेपाल सरकार र सम्बन्धित निकायलाई र यहाँ टिकट बेच्ने जिम्मा पाएका एजेन्सीलाई समेत त्यसो नगर्न नेपाली दूताबासद्वारा अनुरोध गर्नुहुन अनुरोध गर्दछु ।
यता, कुवेतस्थित नेपाली दूताबासले एक विज्ञप्ति जारी गर्दै हिमालय एअरलाइन्सको भाडादरको बारेमा हल्लाको पछाडि नलाग्न आग्रह गरेको छ । सामाजिक सञ्जालमा हिमालय एअरलाइन्सको उडान भाडा कोरोना जाँचसमेत गरेर १९० कुवेती दिनार रहेको भनेर प्रचार गरिएको भन्दै यसमा विश्वास नगर्नसमेत दूताबासले आग्रह गरेको छ ।
भाडा सम्बन्धमा दूताबासको कुनै भूमिका नरहेको तथा दूताबासद्वारा सूचित आधिकारिक सूचनामा यस्तो जानकारी कतै उल्लेख नभएको दूताबासले जनाएको छ । दूताबासले गत १८ जुनमा जारी गरेको सूचनाअनुसार नै भाडादर भएको जनाएको छ ।
कुवेतदेखि काठमाडौंको चार्टर्ड फ्लाइटका लागि नेपाल सरकारले तोकेको प्रतिव्यक्ति भाडादर ४१० अमेरिकी डलर (सम्पूर्ण करहरूसहित) रहेको हु“दा त्यहीअनुसार तयारी गर्न स्वदेश फर्किने तयारीमा रहेका सम्पूर्ण नेपालीहरूलाई दूताबासले आग्रह गरेको छ ।
