काठमाडौं– नेपाली कांग्रेसले ७५ प्रतिशत वैदेशिक रोजगार (म्यानपावर) व्यवसायीको इजाजतप्राप्त संस्था नवीकरण नहुने जनाएको छ । शनिबार वैदेशिक रोजगार विभागले एक वर्षमा म्यानपावर व्यवसायीले एक सय कामदार पठाएको खण्डमा मात्र संस्था नवीकरण हुने जनाएपछि कांग्रेसले सोमबार ७५ प्रतिशतको संस्था नवीकरण असम्भव भएको भन्दै आपत्ति जनाएको हो ।
कांग्रेसको संघीय संसद् सिंहदरबारमा रहेको संसदीय दलको कार्यालयले प्रमाणित हुने कागजात पत्र बुझाए मात्र नवीकरण हुने व्यवस्था वर्तमान अवस्थामा मान्य नहुने भन्दै विज्ञप्तिमार्फत विरोध गरेको छ ।
विभागको जारी गरेको इजाजतप्राप्त संस्था नवीकरणसम्बन्धि १ को ‘ग’ मा प्रत्येक वर्ष कम्तिमा एक सय जना कामदार वैदेशिक रोजगारीमा पठाएको प्रमाणित हुने कागजात बुुझाएको खण्डमा मात्र संस्था नवीकरण हुने उल्लेख छ ।
नोबेल कोरोना भाइरस (कोभिड–१९) को महामारीमा युवाहरु वैदेशिक रोजगारीमा जान बञ्चित भएका र विदेशबाट पनि श्रमिकहरुको माग नगरिएको हुँदा विभागले १ सय कामदार नपठाएको अवस्थामा संस्था नवीकरण नहुने भन्नु उचित नभएको विज्ञप्तिमा जनाइएको छ ।
दलका सचेतक बालकृष्ण खाणद्वारा जारी विज्ञप्तिमा भनिएको छ, ‘वैदेशिक रोजगारीमा वार्षिक एक सय कामदार पठाउनुपर्ने बाध्यात्मक अवस्थाले नेपालका ७५ प्रतिशत वैदेशिक रोजगार व्यवसायीको इजाजत पत्र नवीकरण नहुने अवस्था सिर्जना भएको छ ।’
