
काठमाडौं– ओमानको सलाम एयरको जहाजमार्फत सोमबार १ सय ६६ नेपाली फर्किएका छन् । ओमानस्थित नेपाली दूतावासको पहलमा नेपाल सरकारले तोकेको चार्टर्ड उडानभन्दा पनि सस्तो मूल्यमा उनीहरुलाई फर्काइएको हो ।
नोबेल कोरोना भाइरस (कोभिड–१९) का कारण समस्यामा परेका उनीहरुलाई सलाम एयरले प्रतिव्यक्ति १ सय १५ रियाल (३६ हजार) मा टिकट उपलव्ध गराएर उद्धार गरेको छ । यसअघि सरकारले ओमानबाट नेपालीको उद्धारका लागि नेपाल एयरलाइन्स र हिमालयन एयरलाइन्समार्फत चार्टर्ड उडान भाडा दर प्रतिव्यक्ति ४५ हजार रुपैंया तोकेको थियो । तर, चार्टर्ड भाडा दर महँगो भयो भन्दै ओमानमा रहेका नेपालीले पटक पटक विरोध गरेसँगै दूताबासको पहलमा भाडादर न्यून पारिएको बताइएको छ ।
ओमानमा रहेका नेपालीले दूताबासलाई चार्टर्ड उडान भाडा दर घटाउनका लागि दुई पटक विरोध गरेका थिए । दुई पटकको विरोधपछि दूताबासले ११ हजार भाडा दर घटाएर उनीहरुलाई फर्काएको छ । सुरुमा सरकारले स्वीकृत गरेको भाडा अहिलेको भन्दा २५ हजार बढी थियो । सुरुमा सरकारले ओमानबाट फर्किनेहरुका लागि ५ सय १० अमेरिकी डलर (लगभग ६२ हजार) शुल्क तोकेको थियो ।
ओमानबाट चार्टर्ड उडानको भाडा दर सस्तोमा तिरेर फर्कनेहरुमध्ये केहीको टिकट कम्पनीले उपलव्ध गराएका छन् भने केहीले आफैँले व्यहोरेको दूतावासले जनाएको छ । तर, दूताबासको सेल्टरमा रहेका १३ जना नेपालीको भने सरकारले नै तिरेको छ । फर्किएका नेपालीलाई बिदाई गर्न मस्कट विमानस्थलमा ओमानका लागि नेपाली राजदूत शर्मिला पराजुली ढकाल सोमबार विहानै पुगेकी थिइन् । नेपालीलाई सरकारले तोकेकोभन्दा पनि सस्तोमा दूतासबासले नेपालीलाई स्वदेश पठाउन सफल भएपछि उनको प्रशंसा गरिएको थियो ।
सस्तो भाडा तिरेर फर्किएका उनीहरुले विपतको घडीमा व्यवसायिक मुनाफाभन्दा पनि सेवाको भावनाका साथ अघि बढ्ने सलाम एयर र दूताबासप्रति आभार व्यक्त गरेका छन् । सोमबार ओमानबाट फर्किएका उनीहरु सबैको पीसीआर नेगेटिभ आएको र सबैलाई सीधै होम क्वारेन्टिनमा लगिएको बताइएको छ । ओमानबाट सोमबार एक जना मृत नेपालीको शव पनि आएको दूताबासले जनाएको छ । दूताबासका अनुासार ४ असारमा १ सय ८० जना नेपाली फर्किने गरी दोस्रो उडान तय गरिएको छ ।