दोहा– नेपाल सरकारले साउदीबाट कोरोना भाइरस (कोभिड–१९) को कारण समस्यामा परेका नेपालीहरुको उद्दारका लागि तोकेको हवाई भाडादर प्रति साउदीमा क्रियाशील तीन संस्थाहरु गैरआवासीय नेपाली संघ, मोरङ सुन्सरी सेवा समाज र नेपाली हातेमालो सेवा समाजले गम्भीर ध्यानाकर्षण भएको जनाएको छ ।
नेपाली सरकारले दोस्रोपटक तोकेको भाडादर पनि महँगो भएको भन्दै विज्ञप्तिमार्फत सरकारलाई ध्यानाकर्षण हराएको एनआरनएन मध्यपूर्व उपसंयोजक राजेन्द्र अर्यालले जानकारी दिएका छन् ।
सरकारले दोस्रोपटक तोकेको भाडादर साउदीको दमामबाट ५३० बाट घटाएर ४३० डलर, रियादबाट ५६५ बाट घटाएर ४६५ डलर र जेद्दाबाट ६९० बाट घटाएर ५९० डलर कायम गरेको छ । क्रियाशील तीन संस्थाहरुले संयुक्त रुपमा पत्रकार सम्मेलन गर्दै नेपाल सरकारले बैदेशिक रोजगारीका लागि विदेशिएका नेपालीहरुलाई वर्तमान कोरोनाको कारण आइपरेको विश्वव्यापी संकटमा विदेशमा भएका नेपालीहरुलाई उद्दारको नाउमा चर्को जहाज भाडा तोकेको र उक्त भाडा तत्काल घटाउनु पर्ने माग गरिएको एनआरएनए साउदीका अध्यक्ष तेज थापाले बताए ।
कल्याणकारी कोषमा करिब ६ अर्बभन्दा बढी रुपियाँ थन्किएर बसेको भन्दै यो विषम परिस्थतिमा उक्त कोषको उपयोग गरी उक्त कोषको संचालन ऐनमा उल्लेख भएको ब्यबस्था अनुसार बिदेशमा महामारीको अबस्थामा उद्दारकोषलाई प्रयोग गर्नु पर्ने सरकारसँग जोडदार माग गरेका छन् ।
अध्यक्ष थापाका अनुसार भाडा दर घटाउने मात्र नभई साउदी अरबको हकमा धेरै नेपालीले आफ्नो टिकट किन्ने अवस्थामा नरहेको र अहिलेसम्म एनआरएनएले खाने बस्ने व्यवस्था गरेका ३४१ जना नेपालीहरुको अवस्था र तिनैमध्य केहि नेपालीलाई १०० डलर अर्थात १२ हजार नेपाली रूपैयाँ भाडा तोक्दा पनि स्वदेश फर्कने अवस्था नरहेको बताए ।
साउदी अरबमा १५ हजारभन्दा बढि अवैधानिक रुपमा नेपाली कामदारहरु रहेका कारण तिनीहरुलाई स्वदेश फिर्तीका लागि नेपाल सरकार र साउदीमा रहेका नियोगहरुले कूटनीतिक पहल गर्नु पर्ने एनआरएनए मध्यपूर्व उपसंयोजक अर्यालले बताए ।
उडान स्थगित
यसैबीच, साउदी अरवबाट आगामी जुन १५ का दिन हुने भनिएको हिमालय एयरलाइन्सको उडान स्थगित भएको साउदीस्थित नेपाली दूताबासले जनाएको छ । दूताबासका अनुसार वायुसेवाको नयाँ उडान र मिति तथा नयाँ हवाई भाडादरका बारेमा अर्को सूचना प्राप्त हुनासाथ जानकारी दिइने जनाएको छ । हवाइ उडानका लागि आवश्यक पर्ने पिसिआर वा आरडिटीजस्ता स्वास्थ्य सम्बन्धी परीक्षण पनि हाललाई नगर्न अनुरोध गरिएको दूताबासले जनाएको छ ।
यसअघि दूताबासले साउदीबाट जुन १५ देखि १८, १९ र २४ मा उडान हुने जनाएको थियो । तत्कालका लागि साउदीको रियाद, दमाम र जेद्धा सहरबाट चार्टर उडानमार्फत स्वदेश फर्कन सकिने जनाएको थियो ।
दूताबासका अनुसार तत्काल २५ सयभन्दा बढी नेपालीलाई स्वदेश फर्काउनु पर्ने अवस्था छ भने १० हजारभन्दा बढीले स्वदेश फर्कन पाऊँ भन्दै फारम भनेको दूताबासले जनाएको छ । साउदीमा करिब तीन लाख बीस हजार नेपाली कामदार कार्यरत रहेका छन् ।
-1745656903.jpeg)